अखेर आमदार रामदास मसराम यांच्या प्रयत्नांना यश.. आता घरकुल धारकांना पाच ब्रास मोफत वाळू मिळणार ऑफलाईन पद्धतीने..

गडचिरोली :-घरकुल धारकांसाठी आनंदाची बातमी असून उद्यापासून म्हणजेच गुरुवार १५ मे पासून गडचिरोली जिल्ह्यातील घरकुल बांधकाम करणाऱ्या लाभार्थींना पाच ब्रास मोफत वाळू पूर्वीप्रमाणेच ऑफलाईन पद्धतीने मिळणार आहे.याबाबत आरमोरी विधानसभा क्षेत्राचे आमदार रामदास मसराम यांनी वेळोवेळी प्रशासनास पत्रव्यवहार करून तसेच गडचिरोली जिल्हाधिकारी अवीश्यांत पंडा यांच्याशी संवाद साधून रेतीसाठी ऑनलाईन वाहतूक चालान बाबत उद्भवणाऱ्या तांत्रिक अडचणी लक्षात आणून दिल्या होत्या.घरकुल धारकांना तांत्रिक अडचणींचा सामना करावा लागू नये; याकरीता आमदार रामदास मसराम यांच्या प्रयत्नांना यश आले असून आता

सर्वत्र उद्यापासून घरकुल लाभार्थ्यांना ऑफलाईन पद्धतीने पाच ब्रास मोफत वाळू वाटप करण्यात येणार आहे.

शासनाच्या वतीने घरकुल योजनेचा लाभ घेणाऱ्या लाभार्थ्यांना पाच ब्रास मोफत वाळू दिली जाते. त्यासाठी रेतीची वाहतूक करण्याकरीता वाहतूक चालान आवश्यक असते.यापूर्वी रेती वाहतुकीसाठी लाभार्थ्यांना ऑफलाईन पद्धतीने म्हणजेच तहसील कार्यालयाकडून वाहतुकीची पावती देण्यात येत होती व लाभार्थी आपल्या सोयीनुसार वाळूची वाहतूक करीत होते.मात्र,काही कालावधी पूर्वी तहसील कार्यालयाकडून रेती वाहतुकीची पावती न देता वाळू डेपो प्रणालीच्या माध्यमातून ऑनलाईन नोंदणी करून पाच ब्रास मोफत वाळू मिळणार असल्याचे महसूल प्रशासनाच्या वतीने कळविण्यात आले होते.त्यानुसार घरकुल लाभार्थ्यांना वाळू डेपो प्रणालीत ऑनलाईन करण्यास तांत्रिक अडचणींना सामोरे जावे लागत होते.अश्यातच आता काही कालावधीत पावसाळ्यास सुरुवात होणार असल्याने रेती अभावी घरकुल बांधकामे ठप्प पडण्याच्या स्थितीत येण्याची शक्यता नाकारता येणार नसल्याने आरमोरी विधानसभा क्षेत्राचे आमदार रामदास मसराम यांनी सदरची बाब शासनाच्या निदर्शनास आणून दिली.त्यामुळे शासन स्तरावरून दखल घेत अखेर आमदार मसराम यांच्या अथक परिश्रमाने घरकुल बांधकामधारकांचा पाच ब्रास मोफत वाळू मिळण्याचा मार्ग मोकळा झाला आहे.