अखेर अत्याचार करणारा आरोपी अटकेत.. – आरोपीचा आत्महत्येचा प्रयत्न; दोरी तुटल्याने प्रयत्न फसला…

पुणे :-बसस्थानक परिसरात उभ्या शिवशाही बसमध्ये एका २६ वर्षीय तरुणीवर अत्याचार (बलात्कार) झाल्याची घटना मंगळवारी पहाटे साडे पाचच्या सुमारास घडली व बुधवारी दुपारच्या उघडकीस आल्याने राज्यात सदर घटनेबाबत सर्वत्र संतापाची लाट उसळली होती.पीडित तरुणी मंगळवारी पहाटेच्या सुमारास पुण्याहून फलटणला जाण्यास निघाली होती.त्यातच ती स्वारगेट बसस्थानकावर बसची वाट पाहत थांबली होती.अशातच ती बसची वाट पाहत असतांना एक अज्ञात इसम तिच्याजवळ येऊन बोलू लागला व तिची बस दुसरीकडे असल्याचे भासवून तिला दुसऱ्या बसकडे नेले.बसमध्ये कुणीही नसल्याचे पाहून त्याने तिच्यावर अतिप्रसंग करून बलात्कार केला व आरोपीने घटनास्थळावरून पोबारा केला होता.अशातच पुण्याचे पोलीस आयुक्त अमितेश कुमार यांनी पहिल्याच दिवशी फिर्याद आल्यानंतर दीड ते दोन तासात विविध पथके गठीत केली गेली. एसटी डेपोच्या आतील २३ आणि बाहेरील ४८ सीसीटीव्ही कॅमेरांची तपासणी करुन आरोपी निष्पन्न करण्यात आला.आरोपीच्या शोधासाठी पाचशे पोलीस तैनात होते.त्यानुसार पुण्यातील स्वारगेट बस डेपोमध्ये २६ वर्षीय तरुणीवर बलात्कार करणारा आरोपी दत्तात्रय गाडे याला काल गुरुवारच्या मध्यरात्री अटक करण्यात आली.पुण्याचे पोलीस आयुक्त अमितेश कुमार यांनी पत्रकार परिषद घेऊन याविषयी माहिती दिली.आरोपी पुण्याच्या शिरूर तालुक्यातील गुनाट गावातील आहे.आरोपीवर चोरीचे गुन्हे दाखल आहेत.मात्र त्याने स्त्री अत्याचार केल्याचा गुन्हा यापूर्वी केल्याचे पोलिसांच्या रेकॉर्डला नाही.आत्महत्येचा प्रयत्न केल्याची माहिती आरोपीने पोलिसांना दिली.दोरी तुटल्याने त्याचा प्रयत्न फसला.त्याच्या गळ्यावर व्रण आहेत.वैद्यकीय तपासणीनंतर खरे समोर येईल,असे पुणे पोलिस आयुक्त अमितेश कुमार म्हणाले.स्वारगेट एसटी डेपोत शिवशाही बसमध्ये झालेल्या बलात्काराच्या प्रकरणाच्या तपासासाठी विशेष पथक स्थापन करण्यात आले आहे.आरोपीला कठोरात कठोर शिक्षा व्हावी,यासाठी हे पथक पुरावे गोळा करेल.यासाठी विशेष वकील दिला जाणार असून जलदगती न्यायालयात केस चालवणार आहोत,असेही त्यांनी सांगितले.