अंगणात चुलीजवळ बसलेल्या चिमुकल्याला बिबट्याने नेले उचलून; चिमुकल्याचा मृत्यू..

गोंदिया :-जिल्ह्याच्या तिरोडा तालुक्यात धक्कादायक तितकीच चित्तथरारक घटना उघडकीस आली आहे. सकाळच्या सुमारास चार वर्षीय चिमुकला आई-वडिलांसह घराच्या मागील अंगणात चुलीजवळ बसलेला असतांनाच परिसरात दबा धरून बसलेल्या बिबट्याने अचानक हल्ला चढवून आई-वडिलांच्या डोळ्यादेखत चिमुकल्याला उचलून नेल्याची घटना आज,शुक्रवार ९ जानेवारी रोजी सकाळच्या सुमारास गोंदिया जिल्ह्याच्या तिरोडा तालुक्यातील खडकी (डोंगरगाव)येथे घडली.यात चिमुकल्याचा काही अंतरावरच मृतदेह आढळून आल्याने कुटुंबीयांनी एकच टाहो फोडला.हियांश शिवशंकर रहांगडाले वय ४ वर्षे रा.खडकी(डोंगरगाव) ता.तिरोडा, जि.गोंदिया असे बिबट्याच्या हल्ल्यात ठार झालेल्या चिमुकल्याचा नाव आहे.

सकाळच्या सुमारास थंडीचा जोर कायम असल्याने गावखेड्यातील बरेच नागरिक शेकोट्या वा पाणी गरम करण्यासाठी चुलीत काळ्या लावून विस्तवाचा आसारा घेतात.अश्याच प्रकारे आज शुक्रवारच्या सकाळी हियांश त्याची आई व वडिल घराच्या मागील अंगणात चुलीजवळ विस्तव शेकत होते.तितक्यात काही कळण्याच्या आत दबा धरून बसलेल्या बिबट्याने अचानक हल्ला करत चिमुकल्याला उचलून नेले. पालकांनी आरडाओरड करत बिबट्याचा पाठलाग करण्याचा प्रयत्न केला; मात्र तो पसार झाला. आरडाओरड केल्याने बिबट्या चिमुकल्याला सोडून जंगलात पसार झाला.हियांशचा मृतदेह घरापासून काही अंतरावर गावकऱ्यांना मिळून आला.घटनेने गावात संतापाची लाट उसळली असून भीतीचे वातावरण पसरले आहे.घडलेल्या दुर्दैवी घटनेने रहांगडाले कुटुंबावर दुःखाचा डोंगर कोसळला असून संपूर्ण गाव शोकसागरात बुडाला आहे.