२० वर्षीय तरुणाचा १७ वर्षीय अल्पवयीन मुलीवर अत्याचार; तरुणाला बेड्या..

नागपूर :-गुन्हेगारी पार्श्वभूमी असलेल्या एका २० वर्षीय तरुणाने १७ वर्षीय अल्पवयीन मुलीला प्रेमाच्या जाळ्यात ओढून लग्नाचे खोटे आमिष दाखवले व नंतर वारंवार शारीरिक अत्याचार केल्याने यात ती गर्भवती राहिल्याचा धक्कादायक प्रकार नागपूरच्या मानकापूर पोलीस ठाण्याच्या हद्दीत उघडकीस आला आहे.प्रकरणी पोलिसांनी २० वर्षीय विवान खांडेकर  रा.मानकापूर, नागपूर यास बेड्या ठोकल्या आहेत.

विवान खांडेकर हा पूर्वीपासूनच गुन्हेगारी प्रवृत्तीचा आहे.त्याच्यावर यापूर्वी मारपीट करण्याचे अनेक गंभीर गुन्हे दाखल आहेत.प्रकरणातील पीडिता व आरोपी विवान यांची ओळख ती इयत्ता ९ वीत शिक्षण घेत असतांनाच झाली होती.त्यावेळेस त्यांच्यात साधी मैत्री होती.मात्र,हळूहळू या मैत्रीचे रूपांतर प्रेमात झाले.सध्या ही पीडित मुलगी इयत्ता १२ वीत शिकते.आरोपीने तब्बल तीन वर्षे लग्नाचे आमिष दाखवून मुलीच्या घरी कुणीही नसतांना राहत्या घरीच तिच्यावर वारंवार शारीरिक अत्याचार केले.एवढेच नव्हे तर,त्याने तिला गोरेवाडा परिसरातील एका  हॉटेलमध्ये नेऊनही तिच्यावर लैंगिक अत्याचार केले.अश्यातच गेल्या काही दिवसांपासून पीडित मुलीची प्रकृती अचानक बिघडली.तिची शारीरिक स्थिती खालावत चालल्याने कुटुंबीयांना संशय आला. त्यांनी तातडीने तिला उपचारासाठी जवळच्या रुग्णालयात नेले.तिथे डॉक्टरांनी तिची तपासणी केली असता,ती गरोदर असल्याचे तपासात समोर आले. मुलीच्या पालकांनी तिला विश्वासात घेत विचारणा केली असता प्रकरणास वाचा फुटली.मुलीच्या पालकांनी क्षणाचाही विलंब न करता थेट मानकापूर पोलीस ठाणे गाठले आणि आरोपीविरोधात तक्रार नोंदवली.घटनेचे गांभीर्य लक्षात घेता पोलिसांनी भारतीय न्याय संहिता आणि पॉक्सो कायद्याच्या विविध कलमांतर्गत गुन्हा दाखल करून आरोपीला अटक केली.आरोपी गुन्हेगारी पार्श्वभूमीचा असल्याने पोलीस अधिक सखोल तपास करीत आहेत.