सावधान..! ठगबाज तुम्हालाही करू शकतात ‘डिजिटल अरेस्ट’… – ठगांनी डॉक्टरला घातला २.८० कोटी रुपयांना गंडा…

उद्रेक न्युज वृत्त :-उत्तर प्रदेशमध्ये सायबर भामट्यांनी संजय गांधी पोस्ट ग्रॅज्युएट इन्स्टिट्यूट ऑफ मेडिकल सायन्सेस (एसजीपीजीआय)मधील न्यूरोलॉजिस्टची फसवणूक करून त्यांच्या खात्यातून तब्बल २.८० कोटी रुपये काढून घेतले आहेत.सीबीआय अधिकारी असल्याचे सांगून ठगांनी डॉक्टरांना सहा दिवस ‘डिजिटल अरेस्ट’ मध्ये ठेवले होते.डॉक्टर रुचिका टंडन यांच्यासोबतच्या फसवणुकीप्रकरणी पोलिसांनी गुन्हा दाखल करून तपास सुरू केला आहे.फसवणूक करणाऱ्यांनी रुचिका यांना मनी लॉन्ड्रिंग प्रकरणात त्यांचे नाव आल्याचा दावा करून धमकावत पैसे ट्रान्सफर करण्यास भाग पाडले आणि तसे न केल्यास कायदेशीर कारवाई करण्याची धमकी दिली.

‘डिजिटल हाऊस अरेस्ट’ मध्ये सायबर गुन्हेगार पीडितांची फसवणूक करण्यासाठी त्यांना त्यांच्या घरात कैद करतात.गुन्हेगार अनेकदा अधिकाऱ्यांची तोतयागिरी करून,एआय व्हॉइस किंवा व्हिडीओ तंत्रज्ञान वापरून ऑडिओ किंवा व्हिडीओ कॉल करतात आणि समोरील व्यक्तीला भीती घालतात.

सायबर पोलिस ठाण्याच्या एका अधिकाऱ्यांच्या म्हणण्यानुसार असे प्रकार सर्रास घडत आहेत. फसवणूक करणारे अनेकदा सीबीआय आणि मुंबई पोलिसांसह नामांकित तपास यंत्रणांचे अधिकारी असल्याचे भासवून फसवणूक करतात.लोकांना असे कॉल आल्यास तात्काळ जवळच्या पोलिस स्टेशनशी संपर्क साधावा.