विहिरीत फेकलेल्या अर्भकाची आई निघाली कुमारी माता; प्रेम प्रकरणातून गर्भधारणा..

गोंदिया :-तालुक्यातील एकोडी गावात मन सुन्न करणारी घटना शनिवार २९ नोव्हेंबर रोजी उघडकीस आली होती. चक्क घराच्या आवारात असलेल्या विहिरीतील पाण्यात एक दिवसाच्या बाळाचे मृत अर्भक आढळून आले होते. सकाळच्या सुमारास विहिरीतील पाणी काढण्यासाठी गेले असता सदरची घटना उघडकीस आली.प्राथमिक तपासात मृत अर्भक हे एक दिवसाचे व मुलाचे असल्याचे स्पष्ट झाले. गोंदिया तालुक्याच्या एकोडी गावातील राजेंद्र श्रीराम ठाकरे यांच्या घराच्या आवारात विहीर असून त्यांचे कुटुंबीय नेहमीप्रमाणे शनिवार २९ नोव्हेंबरला सकाळच्या सुमारास विहिरीचे पाणी भरण्यासाठी विहिरीजवळ गेले असता विहिरीत पाहतात तो काय पाण्यात एक मृत अर्भक तरंगताना दिसून आला.सदरची माहिती गावात वाऱ्यासारखी पसरली आणि गावकऱ्यांनी घटनास्थळी धाव घेत एकच गर्दी केली होती.लागलीच घटनेची माहिती गंगाझरी पोलिस ठाण्याला मिळताच घटनास्थळी एपीआय सुधीर वर्मा पोलिस पथकासह घटनास्थळी दाखल होत  पंचनामा केला.घटनेने परिसरात शंका-कुशंका वाढीस लागून चर्चेला उधाण आले होते.याप्रकरणी एकोडी गावातील एका संशयित कुटुंबाची पोलिसांनी चौकशी सुरू केली होती. याप्रकरणाची चौकशी पूर्ण झाल्यानंतरच यातील नेमके सत्य बाहेर येण्याची शक्यता वर्तविण्यात आली असतांनाच गंगाझरी पोलीस ठाण्याचे एपीआय सुधीर वर्मा यांनी आपल्या पथकासह तपासकार्य सुरू केले असता एका अल्पवयीन मुलीने प्रेम प्रकरणातून गर्भधारणा झालेल्या बाळाला जन्म देताच विहिरीत फेकल्याची धक्कादायक बाब समोर आली.अल्पवयीन कुमारी माता त्यातच आपली समाजात बदनामी होईल, यासाठी तिने हे घृणास्पद कृत्य केल्याचे समोर आल्याने त्या अल्पवयीन मुलीला पोलिसांनी ताब्यात घेत प्रकरणी गंगाझरी पोलिस ठाण्यात भारतीय न्याय संहिता कलम १०३(१),१२,२३८ अतंर्गत गुन्हा दाखल करण्यात आला. प्रकरणाचा पुढील तपास गंगाझरी पोलिस प्रशासन करीत आहे.