लाडक्या बहिणींसाठी आनंदाची बातमी; आजपासून फेब्रुवारी महिन्याच्या वितरणाची प्रक्रिया सुरू..

उद्रेक न्युज वृत्त :-मुख्यमंत्री माझी लाडकी बहीण योजनेंतर्गत मागील फेब्रुवारी महिन्याच्या प्रलंबित असलेल्या सन्मान निधी वितरणाची प्रक्रिया आज, शुक्रवार २७ मार्चपासून सुरू झाली असून राज्याच्या महिला व बालकल्याण मंत्री अदिती तटकरे यांनी ही घोषणा केली आहे.त्यामुळे पुढील दोन ते तीन दिवसांत सर्व पात्र लाभार्थी महिलांच्या आधार संलग्न खात्यात फेब्रुवारी महिन्याचे दीड हजार रुपये जमा होणार आहेत. तर काही महिलांच्या खात्यात आज पासूनच दीड हजार रुपये जमा होण्यास सुरुवात झाली आहे.

मुख्यमंत्री-माझी लाडकी बहीण योजनेंतर्गत पात्र लाभार्थी महिलांना दरमहा दीड रुपयांचे अर्थसहाय्य दिले जाते.या माध्यमातून महिलांचे सशक्तीकरण साधण्याचा सरकारचा हेतू आहे.गत अनेक दिवसांपासून फेब्रुवारी महिन्याचा लाभ केव्हा मिळणार?असा सवाल महिला वर्गातून केला जात होता.त्यानुसार,आता फेब्रुवारीच्या निधी वितरणासाठी आवश्यक असलेली तांत्रिक प्रक्रिया पूर्ण करण्यात आली असल्याने रक्कम लाभार्थी महिलांच्या खात्यात जमा होण्यास सुरुवात झाली आहे. मंत्री अदिती तटकरे यांनी याविषयी आपल्या एका पोस्टमध्ये म्हटले की,मुख्यमंत्री माझी लाडकी बहीण योजनेतील सर्व पात्र लाभार्थ्यांना फेब्रुवारी महिन्याचा सन्मान निधी वितरित करण्याची तांत्रिक प्रक्रिया आजपासून सुरू करण्यात आली आहे.पुढील २-३ दिवसांत सर्व पात्र लाभार्थ्यांच्या आधार संलग्न बँक खात्यात हा सन्मान निधी जमा होणार आहे.महायुती सरकारचा दृढ निश्चय,मुख्यमंत्री देवेंद्र फडणवीस, उपमुख्यमंत्री एकनाथ शिंदे,उपमुख्यमंत्री सुनेत्राकाकी पवार यांचे सातत्यपूर्ण मार्गदर्शन व महाराष्ट्रातील लाडक्या बहिणींचा दृढ विश्वास या बळावर मुख्यमंत्री माझी लाडकी बहीण योजनेची दमदार वाटचाल यापुढेही अशीच सुरू राहणार हा मला विश्वास आहे.