निर्लज्ज चोरटे; कुटूंब शहीद जवानाच्या शोकसागरात असतांना चोरट्यांनी केली घरफोडी..

गडचिरोली :-प्राणाची आहुती देणाऱ्या शहीद जवानाचे कुटुंब शोकसागरात असतांना निर्लज्ज चोरट्यांनी चक्क शहीद जवानाच्या गडचिरोली स्थित घरी डाव साधित घरफोडी केल्याची घटना काल शुक्रवारी सकाळच्या सुमारास उघडकीस आल्याने परिसरात एकच खळबळ उडाली.प्रकरणी गडचिरोली पोलिसांनी घटनास्थळ गाठत पंचनामा करून पुढील तपास सुरू केला आहे.

जिल्ह्याच्या भामरागड तालुक्यातील दिरंगी-फुलनार जंगल परिसरात मंगळवारी पोलिस-नक्षल चकमकीत सी-६० चे जवान महेश नागुलवार शहीद झाले होते.

बुधवारी नागुलवार यांच्या पार्थिवावर त्यांच्या स्वगावी चामोर्शी तालुक्यातील अनखोडा येथे अंत्यसंस्कार पार पडले.कुटूंबीय अनखोडा येथेच विरहात असतांना इकडे गडचिरोली शहरातील धानोरा मार्गावरील कारमेल शाळा परिसरातील शहीद जवान नागूलवार यांच्या घरी कुणीच नसल्याचा फायदा घेत,अज्ञात चोरट्यांनी रात्रीच्या सुमारास घरात प्रवेश केला.चोरट्यांनी घरातील आलमारी तोडून साहित्य अस्ताव्यस्त फेकले.मात्र,त्यांच्या हाताला काहीच न लागल्याने त्यांना परतावे लागले.घटनेची माहिती मिळताच गडचिरोली पोलिसांनी घटनास्थळी धाव घेत पंचनामा करून अज्ञात चोरट्या विरुद्ध गुन्हा नोंदविला आहे.