धावत्या दुचाकीवर वीज कोसळून जिल्हा परिषद शाळेच्या मुख्याध्यापकाचा मृत्यू..

नांदेड :-जिल्ह्यातील माहूर तालुक्यात आज,गुरुवारी १५ मे रोजी दुपारच्या सुमारास वादळी वाऱ्यासह विजांचे कडकडाट व अवकाळी पावसाने चांगलेच झोडपले. अश्यातच दुपारच्या सुमारास पाऊस पडत असतांनाच आपल्या गावाकडे दुचाकीने जात असतांना अचानकपणे धावत्या दुचाकीवर वीज कोसळल्याने एका शिक्षकाचा रस्त्यातच मृत्यू झाल्याची घटना आज गुरुवारी दुपारच्या सुमारास माहूर शहरापासून दोन किमी अंतरावर असलेल्या मालवाडा घाटात घडली.यात विदर्भातील हिवरा संगम येथील जिल्हा परिषद प्राथमिक शाळेत मुख्याध्यापक असलेले संजय पांडे वय ५६ वर्षे रा.करंजी,ता.माहूर, जि.नांदेड यांचा जागीच मृत्यू झाला.घटनेने स्थानिकांनी घटनास्थळी धाव घेतली.दरम्यान, खिशातील मोबाईल फोन वाजला असता,फोन काढायसाठी गेले व तितक्यातच अंगावर विज कोसळली.पावसाळी वातावरणात मोबाईलचा वापर टाळण्याचे आवाहन प्रशासन करीत असते मात्र, त्याकडे दुर्लक्ष केल्याने अश्या घटना घडत असतात.