दहावी-बारावी परीक्षेचा निकाल १५ मे पूर्वी होणार जाहीर..

उद्रेक न्युज वृत्त :-सध्या दहावी-बारावी बोर्डाची परीक्षा सुरू असून बारावीच्या विद्यार्थ्यांचा माहिती तंत्रज्ञान (आयटी) विषयाचा पेपर तर दहावीच्या विद्यार्थ्यांचेही दोन पेपर बाकी आहेत.परीक्षा ही येत्या १७ मार्च रोजी संपणार आहे.तत्पूर्वी,ज्या विषयांचे पेपर झाले आहेत,अश्यांच्या उत्तरपत्रिकांची तपासणी वेळेत व्हावी,यासाठी दररोज शाळेच्या वेळेत विषय शिक्षकाने किमान ३५ उत्तरपत्रिका तपासाव्यात,असे बोर्डाकडून सांगण्यात आले आहे.दुसरीकडे उत्तरपत्रिका तपासणीवर नेहमीप्रमाणे शिक्षक संघटनांचा बहिष्कार नसल्याने दहावी-बारावीच्या विद्यार्थ्यांचे निकाल १५ मेपूर्वीच जाहीर होतील,अशी माहिती बोर्डातील वरिष्ठ अधिकाऱ्यांनी दिली.

इयत्ता बारावीच्या विद्यार्थ्यांची ११ फेब्रुवारीपासून तर दहावीच्या विद्यार्थ्यांची २१ फेब्रुवारीपासून परीक्षा सुरू आहेत.परीक्षा नेहमीपेक्षा १० दिवस अगोदर सुरू झाल्याने निकाल देखील १५ मेपूर्वीच जाहीर केला जाणार आहे.त्याअनुषंगाने नागपूर,अमरावती, नाशिक,लातूर,पुणे,छत्रपती संभाजीनगर,मुंबई, कोल्हापूर व कोकण या विभागीय मंडळांकडून तपासलेल्या उत्तरपत्रिकांचा दररोज बोर्डाचे अधिकारी आढावा घेत आहेत.