जमिनीच्या वाढीव मोबदल्यावरून वाद; एसडीओच्या खुर्चीसह इतर साहित्य जप्त..

गोंदिया शहराच्या क्रीडा संकुल परिसरातील राजू नागवंशी यांच्या मालकीची सुमारे ११ आर जमीन सन २००९ मध्ये भूसंपादन प्रक्रियेत घेण्यात आली होती.या जमिनीच्या मोबदल्याबाबत शासनाकडून रक्कम मिळाली.मात्र,वाढीव मोबदला मिळत नसल्याचा दावा नागवंशी यांनी केला.वाढीव मोबदल्यासाठी त्यांनी प्रशासनाकडे पाठपुरावा केला.मात्र,अपेक्षित कार्यवाही होत नसल्याने त्यांनी न्यायालयाचा दरवाजा ठोठावला.या प्रकरणाची सुनावणी दिवाणी न्यायाधीश वरिष्ठ स्तर यांच्या न्यायालयात झाली.न्यायालयाच्या आदेशानंतर संबंधित रकमेच्या वसुलीसाठी उपविभागीय अधिकारी कार्यालयातील साहित्य जप्त करण्याचे आदेश देण्यात आले.त्यानंतर,काल गुरुवारी तक्रारदार यांच्या वकिलासह न्यायालयातील कर्मचारी यांनी उपविभागीय अधिकारी यांच्या कार्यालयात जात कारवाईला सुरुवात केली. यावेळी उपविभागीय अधिकारी यांच्या खुर्चीसह कार्यालयातील इतर साहित्य जप्त करण्यात आले. तक्रारदार राजू नागवंशी यांच्या वकिलांच्या उपस्थितीत जप्तीची कारवाई करण्यात आल्याने कार्यालयात एकच धांदल उडाली.