चार भाषांवर प्रभुत्व गाजवणाऱ्या नक्षलीची ओळख एका सेल्फीमुळे; वाचा रोमांचक कहाणी..

उद्रेक न्युज वृत्त :-ओडिशा आणि छत्तीसगड सीमेवर झालेल्या चकमकीत चलपती हा म्होरक्या मारला गेला.अनेक दशके चलपती कोण?याची माहिती नसणाऱ्या पोलिसांना त्याची माहिती पत्नीसोबत काढलेल्या सेल्फीमुळे मिळाली.त्याची पत्नीही नक्षलवादी कारवायांत सहभागी आहे.रामचंद्र रेड्डी हा चलपती नावानेच नक्षलींमध्ये ओळखला जातो. ओडिशाच्या नयागडमध्ये २००८ मध्ये झालेल्या सुरक्षा दलातील हल्ल्याचा मास्टरमाईंड होता.या हल्ल्यात १३ सुरक्षा कर्मीचा मृत्यू झाला होता.पोलिसांचा शस्त्रसाठा लुटल्यानंतर नक्षलवादी सुरक्षित नयागडमधून बाहेर पडतील याची तजवीज त्याने केली होती.पोलिसांची कुमक या हल्ल्यावेळी मिळू नये म्हणून त्याने या भागाकडे येणाऱ्या सर्व रस्त्यांवर झाडे पाडून अडथळे निर्माण केल होते.आंध्र प्रदेशच्या चित्तूर जिल्ह्यातील चलपती तेथील नक्षलवादी चळवळ संपल्यानंतर छत्तीसगड आणि ओडिशात कार्यरत झाला.गेले अनेक महिने तो त्याच्या गुडघ्याच्या त्रासामुळे प्रवास करू शकत नसल्याने बस्तर जिल्ह्यातील दरभा गावात राहत होता.तो आता पासष्टीचा आहे.शाळेचे तोंडही न पाहिलेल्या चलपतीचे वाचन मात्र अफाट होते.तेलुगू,हिंदी,इंग्लिश आणि ओडिया या भाषांवर प्रभुत्व होते.लष्करी युद्धकला आणि गनिमी कावा यात तो तज्ज्ञ होता.जंगलात वास्तव्य करीत असतांना तो अरुणा ऊर्फ चैतन्य व्यंकट रवीच्या संपर्कात आला.ती आंध्र,ओडिशा सीमावर्ती समितीच डेप्युटी कमांडर होती.सहवासातून प्रेम फुलल्यावर दोघे विवाहबद्ध झाले.दशकभर चलपती कोण? याची साधी कल्पनाही पोलिसांना नव्हती.२०१६ मध्ये एका चकमकीत एक फोन सापडला.त्यात त्या दोघांचा सेल्फी होता.त्यावरून त्याची ओळख पटली आणि पोलिसांना त्याचा ठावठिकाणा समजला.त्यानंतर त्याच्या १२ साथीदारांनी त्याला सुरक्षितस्थळी हलवत असतांना झालेल्या चकमकीत चलपती मृत्यू पावला.