आरमोरी तालुक्यात बस्तान मांडलेल्या जंगली हत्तींचा शिरकाव कुरखेडा तालुक्यात..

गडचिरोली :-जिल्ह्याच्या आरमोरी तालुक्यात मागील काही दिवसांपासून बस्तान मांडलेल्या जंगली हत्तींनी कुरखेडा तालुक्यात शिरकाव केला आहे.काल शुक्रवारी पहाटेच्या सुमारास हत्तींनी कुरखेडा तालुक्याच्या भगवानपूर शेतशिवारात हैदोस घालत शेतकऱ्यांच्या ऊन्हाळी धान पिकांची पऱ्हे पायाखाली तुडवल्याने ऊन्हाळी धान उत्पादक शेतकरी संकटात सापडले आहेत.विशेष म्हणजे,आरमोरी तालुक्यात बस्तान मांडलेल्या जंगली हत्तींनी चार दिवसांपूर्वी चामोर्शी चक शेतशिवारात प्रचंड हैदोस घातला होता.परिसरातील शेतकऱ्यांच्या शेतपिकाची तसेच शेतीपयोगी साहित्यांसह शेतमालाचे प्रचंड नुकसान केले होते.घटनेची माहिती मिळताच वनविभागाच्या पथकाने तात्काळ घटनास्थळ गाठत पंचनामा केला होता.प्रकरणी वनविभागाने परिसरातील नागरिक तसेच शेतकऱ्यांना सतर्कता बाळगण्याचे आवाहन केले आहे.बलाढ्य असलेले जंगली हत्ती बऱ्याच कालावधीपासून गडचिरोली जिल्ह्याच्या वेगवेगळ्या ठिकाणी बस्तान मांडून धुमाकूळ घालत असल्याने नागरिक तसेच शेतकऱ्यांमध्ये चिंतेचे वातावरण पसरले आहे.