अंगणवाडी सेविका व मदतनीसांना मिळणार दिवाळीपूर्वीच दोन हजाराची भाऊबीज भेट..

उद्रेक न्युज वृत्त :-महाराष्ट्र राज्यातील एकात्मिक बालविकास सेवा योजनेअंतर्गत कार्यरत अंगणवाडी सेविका व मदतनीसांसाठी आनंदाची बातमी असून या सर्वांना दिवाळीपूर्वीच भाऊबीज भेट म्हणून प्रत्येकी दोन हजार रुपये मिळणार आहेत.एकात्मिक बाल विकास सेवा योजना या केंद्र पुरस्कृत योजनेअंतर्गत अंगणवाडी सेविका व मदतनीस या मानधनी कर्मचाऱ्यांना सन २०२६-२७ या आर्थिक वर्षात प्रत्येकी रु.२,०००/-प्रमाणे भाऊबीज भेट रक्कम देण्यास शासन मंजूरी देण्यात आली असून यासाठी तब्बल ४२ कोटी ८१ लाख ९४ हजार रुपये इतका निधी उपलब्ध करुन देण्यात आला आहे. अश्यातच एकात्मिक बाल विकास सेवा योजनेअंतर्गत कार्यरत असलेल्या अंगणवाडी सेविका व मदतनीस यांना भाऊबीज भेट अदा करण्याकरिता आयुक्त,एकात्मिक बाल विकास सेवा योजना,महाराष्ट्र राज्य, नवी मुंबई यांना नियंत्रक अधिकारी म्हणून घोषित करण्यात आले आहे.आयुक्त,एकात्मिक बाल विकास सेवा योजना,महाराष्ट्र राज्य,नवी मुंबई यांनी अंगणवाडी सेविका व मदतनीस यांना भाऊबीज भेट तात्काळ अदा होण्याच्या अनुषंगाने आवश्यक ती कार्यवाही करावी,असे स्पष्ट करण्यात आले आहे. विशेष म्हणजे,राज्यात १ लाख ८ हजार ६२७ अंगणवाडी सेविका आणि १ लाख ५ हजार ४७० अंगणवाडी मदतनीस अशी एकूण २ लाख १४ हजार ९७ पदे कार्यरत आहेत.सदरची दोन हजाराची रक्कम ही दिवाळीपूर्वीच अदा करण्यात येणार असल्याने अंगणवाडी सेविका व मदतनीसांची दिवाळी गोड होणार आहे.