५० लाख रुपयांचे बक्षीस असलेला कुख्यात नक्षलवादी शरण..

उद्रेक न्युज वृत्त :-छत्तीसगडच्या नक्षली चळवळीचा कणा मानला जाणारा आणि दरभा डिव्हिजनल कमिटीचा सचिव बारसे देवा उर्फ सुक्का याने १ जानेवारीच्या रात्री तेलंगणा पोलिसांसमोर आत्मसमर्पण केले.त्याच्यावर शासनाने तब्बल ५० लाख रुपयांचे बक्षीस जाहीर केले होते.विशेष म्हणजे,केंद्र सरकारचे ‘ऑपरेशन कगार’ आणि सुरक्षा जवानांचा वाढता प्रभाव यामुळे बारसे देवाने मध्यस्थांमार्फत चार राज्यांच्या पोलिसांशी संपर्क साधला आणि तेलंगणातील कोठगुडेम जिल्हा पोलिसांसमोर शरणागती पत्करली आहे.बारसे देवा हा मूळचा छत्तीसगडच्या पुर्वर्थी गावचा रहिवासी आहे.पीएलजीए (PLGA) च्या पहिल्या बटालियनचा कमांडर म्हणून त्याने अनेक वर्ष काम केले. छत्तीसगडमध्ये केंद्रीय राखीव दलाच्या(सीआरपीएफ) जवानांवर झालेल्या अनेक प्राणघातक हल्ल्यांमध्ये त्याचा थेट सहभाग होता.हिडमा सेंट्रल कमिटीत गेल्यानंतर त्याच्या सर्व जबाबदाऱ्या देवाने सांभाळल्या होत्या.त्याच्या आत्मसमर्पणानंतर नक्षली चळवळीची मोठी माहिती पोलिसांच्या हाती लागण्याची शक्यता आहे.त्यातच,काही दिवसांपूर्वी आंध्र प्रदेश पोलिसांनी जहाल नक्षलवादी माडवी हिडमा याचा खात्मा केला होता.तेव्हापासूनच बारसे देवा दहशतीखाली होता. हिडमाच्या मृत्यूमुळे नक्षली गटात कमालीचा गोंधळ निर्माण झाला आहे.त्यामुळे ‘मरण की शरण’ अशी अवस्था नक्षली संघटनेची झाल्याने अनेकजण हिंसेचा मार्ग सोडू लागलेत.