२४ वर्षीय तरुणाची विहिरीत उडी घेऊन आत्महत्या..

गोंदिया :-जिल्ह्याच्या अर्जुनी मोरगाव तालुक्यातील देऊळगाव बोदरा येथील एका २४ वर्षीय तरुणाने

मानसिक तणावामुळे शेतातील विहिरीत उडी घेऊन आत्महत्या केल्याची घटना काल,सोमवारी २० जानेवारीच्या सकाळी उघडकीस आली.चेतन दिगंबर बडोले वय २४ वर्षे असे विहिरीत उडी घेऊन

आत्महत्या केलेल्या अविवाहित तरुणाचे नाव आहे.

माहितीनुसार,चेतन हा बऱ्याच दिवसांपासून मानसिक तणावात होता.घटनेच्या एक दिवसापूर्वी तो सायंकाळच्या सुमारास घरून बाहेर गेला होता.रात्र होऊनही त्या दिवशी तो परतलाच नसल्याने कुटुंबीय चिंतातुर झाले होते.अशातच रस्त्यालगतच्या शेतातील एका विहिरीत त्याचा मृतदेह काल सोमवारी सकाळच्या सुमारास आढळून आल्याने कुटुंबीयांनी घटनास्थळी धाव घेतली.त्यानुसार चेतनचा भाऊ महेंद्र बडोले यांनी याबतची तक्रार अर्जुनी मोरगाव पोलिस स्टेशन येथे दाखल केली.घटनेचा पुढील तपास अर्जुनी मोरगाव पोलीस प्रशासन करीत आहे.

चेतन हा आई-वडील व भाऊ यांच्यासह बोदरा येथे राहत होता.त्याचे बारावीपर्यंत शिक्षण झाले होते.वडील वनमजूर म्हणून कार्यरत असतांना त्यांना अर्धांगवायूचा आजार जडला.ते प्रकृती अस्वास्थ्याने घरीच असतात.मागील काही दिवसांपासून चेतन हा मानसिक आजाराने ग्रस्त होता.त्याच्यावर औषधोपचारसुद्धा सुरू होते.