सोन्याचे दर एक लाखाच्या खाली येण्याची शक्यता..!

उद्रेक न्युज वृत्त :-सोने-चांदीच्या दराने उच्चांकी गाठल्यानंतर हळूहळू घसरण म्हणजेच दर कमी होऊ लागल्याचे चित्र आहे.यामुळे पुढील काळात सोन्याच्या दरात मोठी घसरण होण्याची शक्यता तज्ज्ञांनी व्यक्त केली आहे.जानेवारी २०२६ मध्ये एमसीएक्सवर सोन्याचा दर १ लाख ८० हजार ७७९ प्रति १० ग्रॅमचा ऐतिहासिक उच्चांक गाठल्यानंतर, फेब्रुवारी २०२६ मध्ये सोन्याच्या दरात मोठी घसरण झाली आहे.१३ फेब्रुवारीला सोन्याचा भाव १ लाख ५६ हजार २०० पर्यंत खाली आला,जो विक्रमी उच्चांकापेक्षा सुमारे २४ हजार ५०० रुपये कमी आहे.काल सोमवारी एमसीएक्सवर सोने ०.६१ टक्के घसरून १ लाख ५४ हजार ९३७ रुपये प्रति १० ग्रॅमवर आले.काही तज्ज्ञांच्या मते भारतात सोन्याचा दर प्रति १० ग्रॅम एक लाख रुपयांपेक्षा खाली येण्याची शक्यता आहे.विशेष बाब म्हणजे,सोन्याच्या दरात वारंवार चढउतार होत असल्याने खरेदीदारांमध्ये फारसा उत्साह नाही.अमित गोयल यांच्या मतानुसार,सोने दराने शिखर गाठले आहे.आता सोन्यातील घसरण आणखी वाढणार आहे.भारतात सोने आधीच सुमारे १५ टक्के घसरले आहे आणि ही घसरण आणखी वाढू शकते.गोयल यांचा विश्वास आहे की,भारतात सोने १ लाख प्रति १० ग्रॅमच्याही खाली येऊ शकते.त्यामुळे, खरेदीदारांनी सोने खरेदीत अती घाई करू नये.लग्न सराईत सोन्याचे दर कमी झाल्यास सर्वसामान्यांना मोठा दिलासा मिळण्याची शक्यता वर्तविण्यात येत आहे.