उद्रेक न्युज वृत्त
गडचिरोली :-सातबाऱ्यातील तीन जणांची नावे वगळण्याच्या कामासाठी ६ हजार रुपयांची लाच घेताना एसीबीच्या पथकाने काल, शुक्रवारी,२ ऑगस्ट ला अहेरी तालुक्यातील महसूल विभागाचा मंडळ अधिकारी आणि तलाठ्यास रंगेहाथ अटक केली आहे.भूषण जौंजाळकर तसेच अहेरी तालुक्यातील चिचगुंडी गावचा प्रभारी तलाठी व्यंकटेश जल्लेवार असे लाच घेणाऱ्या महसूल कर्मचाऱ्याचे नाव आहे.
विशेष म्हणजे,महसूल विभागाद्वारे महसूल सप्ताह दिन साजरा केला जात असताना याच विभागाचे कर्मचारी लाच स्वीकारतांना अडकल्याने महसूल विभागात खळबळ उडाली आहे.संबंधित तक्रारदारास सातबारावरुन तिघांचे नाव वेगळे करायचे होते. यासाठी चिचंगुडीचे तलाठी जल्लेवार यांच्याकडे त्यांनी अर्ज सादर केले होते.मात्र सदर कामासाठी तलाठ्याने ९ हजार रुपये लाचेची मागणी केली. तडजोडीअंती ६ हजार रुपये देण्याची तक्रारदाराने तयारी दर्शविली.
१ ऑगस्टला लाच मागणी केल्याप्रकरणी धानोरा तालुक्यातील बांधकाम विभागाचा कनिष्ठ अभियंता अक्षय आगळे यास अटक करण्यात आली होती. त्यानंतर २ ऑगस्टला अहेरीत मंडळाधिकारी व तलाठ्यास लाच घेताना पकडले.२४ तासांत दोन कारवायांत तिघांना जेरबंद केल्याने लाचखोरांचे धाबे दणाणले आहेत.
