मुख्य कार्यकारी अधिकाऱ्यांकडून आकांक्षीत तालुका कार्यक्रम आढावा.. – सिरोंचा येथे आढावा बैठक संपन्न…

गडचिरोली :-आकांक्षीत तालुका कार्यक्रमाच्या अनुषंगाने गडचिरोली जिल्हा परिषदेचे मुख्य कार्यकारी अधिकारी सुहास गाडे यांनी सिरोंचा तालुक्याच्या अती दुर्गम भागात आरोग्य सुविधांची पाहणी करीत आरोग्य केंद्रांना भेटी दिल्या. आरोग्याच्या सोई सुविधा संदर्भात माहिती घेतली आणि सुरू असलेल्या पायभूत सुविधा तात्काळ पूर्ण कराव्यात,अशा सूचना दिल्या.सोबतच शाळा, अंगणवाडी यांना भेटी देऊन शिक्षण आणि पोषण संबंधित सखोल चौकशी केली व संबंधित विभागाला सेवा उत्कृष्ठ पद्धतीने द्यावे अशा सूचना दिल्या.

सोबतच पंचायत समिती सिरोंचा येथे भेट देऊन आकांक्षीत तालुका कार्यक्रम संदर्भात सर्व विभाग प्रमुख यांची आढावा बैठक घेतली.बैठकीत आरोग्य, शिक्षण,पोषण,पायाभूत सुविधा,कृषी आणि सामाजिक विकास यासारख्या महत्त्वाच्या विभागांच्या निर्देशकांचा सखोल आढावा घेण्यात आला व गट विकास अधिकारी पंचायत समिती सिरोंचा यांना आकांक्षीत तालुका कार्यक्रमाकडे प्राथमिकता देऊन निर्देशांक वाढण्यासंदर्भात सूचना दिल्या .

बैठकीदरम्यान,संबंधित अधिकारी व कर्मचाऱ्यांसोबत चर्चा करून आकांक्षीत तालुका सिरोंचा मधील स्थिती सुधारण्यासाठी आवश्यक उपाययोजनांवर भर देण्यात आला.विशेषतः शिक्षण आणि आरोग्य या क्षेत्रांमध्ये सुधारणा घडवून आणण्यासाठी नव्या योजनांची अंमलबजावणी करण्यावर विचारविनिमय झाला.

मुख्य कार्यकारी अधिकारी जिल्हा परीषद गडचिरोली यांनी सिरोंचा तालुक्याला आकांक्षीत तालुका यादीतून बाहेर काढण्यासाठी प्रयत्न करण्याचे आश्वासन दिले. तसेच,स्थानिक प्रशासन आणि नागरिकांनी एकत्रितपणे काम करून विकासाच्या दिशेने पुढे जाण्याचे आवाहन केले.

या भेटीमुळे स्थानिक प्रशासनाला नव्या संकल्पनांचा आधार मिळाला असून, आकांक्षीत तालुका कार्यक्रमांतर्गत सिरोंचा तालुक्याच्या सर्वांगीण विकासाला गती मिळण्याची अपेक्षा आहे.आढावा बैठकीस गडचिरोली जिल्हा परिषदेचे मुख्य कार्यकारी अधिकारी सुहास गाडे,जिल्हा आरोग्य अधिकारी जिल्हा परिषद गडचिरोलीचे डॉ.प्रताप शिंदे,श्रीकृष्ण पेंदाम गटविकास अधिकारी पंचायत समिती सिरोंचा,निलकंठम दोन्थुला गट शिक्षण अधिकारी पंचायत समिती सिरोंचा,आकांक्षीत तालुका फेलो शेषराव नागमोती सह सर्व विभाग प्रमुख तथा कर्मचारी उपस्थित होते.