मशिन घेतली; पण खराब निघाली..! रक्कम परत करण्यास कंपनीचा नकार.. -शेतकऱ्याची ग्राहक तक्रार निवारण आयोगात धाव; कंपनीला दणका..

उद्रेक न्युज वृत्त :-ग्राहक हा बाजारपेठेतील राजा मानला जातो.जर कां ग्राहकांनी एखाद्या वस्तूवर वा साहित्य खरेदीवर बहिष्कार टाकला वा ती वस्तूच खरेदी केली नाही तर..तुमच्या उत्पादनाला काहीही किंमतच उरणार नाही.त्यामुळे ग्राहकांशी पंगा घेणे चांगलेच महागात पडू शकते आणि अश्याच प्रकारचा ग्राहक शेतकऱ्याशी घेतलेला पंगा एका कंपनीला चांगलाच महागात पडला आहे.शेतकऱ्याने शेतात केळीची लागवड करण्यासाठी एका कंपनीकडून “रोटा कल्टिव्हेटर रिगर मशीन” बोलावली आणि कंपनीला ८० हजार रुपये अदा केले.रक्कम दिल्यानंतर कंपनीने मशिन पाठवली.मात्र, वापरण्यात येणारी मशिन काम करत नसल्याने शेतकऱ्याने कंपनीशी संपर्क साधून माहिती दिली असता कंपनीने पाठविलेला व्हिडिओ पाहून मशीनचा वापर करण्याच्या सूचना दिल्या.तरीही मशिन काम करीत नव्हती.त्यामुळे कंपनीने दुसरी मशिन पाठवली.दुसरी मशिनही काम करीत नसल्याने शेतकऱ्याने दिलेले ८० हजार रुपये परत देण्याची विनंती केली.पण कंपनीने कुठलाही प्रतिसाद दिला नाही.त्यामुळे शेतकऱ्याने यवतमाळ जिल्हा ग्राहक तक्रार निवारण आयोगात धाव घेत कंपनीने केलेल्या कारस्थानाचे कथन केले.त्यानुसार, यवतमाळ जिल्हा ग्राहक तक्रार निवारण आयोगाचे अध्यक्ष डॉ.रवींद्र उल्हास मराठे,सदस्य अमृता वैद्य यांच्या उपस्थितीत तक्रारीवर सुनावणी झाली.यामध्ये ॲग्रीनिर ॲग्रो मशीनरी प्रा.लि.ने सदोष सेवा दिल्याचे स्पष्ट झाले आणि शेतकऱ्याच्या बाजूने निर्णय देण्यात आला. प्रकरणी कंपनीने श्रावण राठोड यांना झालेल्या शारीरिक व मानसिक त्रासापोटी १० हजार रुपये आणि तक्रार खर्चाचे ५ हजार रुपये व कंपनीला मशिनसाठी दिलेले ८० हजार रुपये परत करून एकूण ९५ हजार रुपये द्यावे, असा आदेश पारित केला.श्रावण देवीदास राठोड रा.सुयोगनगर,यवतमाळ असे शेतकऱ्याचे नाव असून सातारा येथील ॲग्रीनिर ॲग्रो मशिनरी प्रायव्हेट लिमिटेड,असे कंपनीचे नाव आहे.विशेष म्हणजे,कंपनीने शेतकऱ्यास मशीन पाठविल्यानंतर प्रशिक्षण देणे आवश्यक होते.त्यातच,दोन्ही मशिन सदोष देऊन ग्राहकाची फसवणूक केली आणि ग्राहक हक्कांचे उल्लंघन केले.प्रकरणी आयोगाने कंपनीला दणका दिला.