उद्रेक न्युज वृत्त
नागपूर :- नागपुरातील सर्वात मोठी बाजारपेठ असलेल्या सीताबर्डी बाजारातील दुकानात ४ तारखेला बॉम्ब ठेवणार असा फोन ११२ वर आल्याने खळबळ उडाली आहे.पोलीस नियंत्रण कक्षाकडून माहिती मिळताच पोलीस आणि बॉम्ब शोध पथकाने घटनास्थळी जाऊन तपासणी केली.मात्र,बाजारपेठेत काहीही संशयास्पद आढळून आलेले नाही.खबरदारी म्हणून बाजारपेठेत गस्त वाढवण्यात आली आहे.
सीताबर्डी बाजारातील मोदी नंबर २ आणि मोदी नंबर ३ बाजार ओळीमध्ये बॉम्ब ठेवणार असल्याचे म्हटले आहे.यात पोलिसांना फोन आलेल्या नंबरची माहिती मिळाली असून या बाबत त्या नंबर वरून नेमका कोणी फोन केला; याचा तपास सुरू असल्याची माहिती बर्डी पोलीस स्टेशनचे पोलीस निरीक्षक आसाराम चोरमोले यांनी दिली आहे.
नागपूरमधील सीताबर्डी बाजार नेहमीच गजबजलेला असतो.नागपूरकर सीताबर्डीत मोठ्या संख्येने खरेदीसाठी येत असतात.सणासुदीच्या काळात तर बाजारपेठ फुलून गेलेली असते.त्यात ४ जून रोजी लोकसभेचा निकाल आहे आणि याच दिवशी या गजबजलेल्या बाजारपेठेत बॉम्ब ठेवण्याची धमकी देण्यात आली आहे.त्यामुळे तपास यंत्रणा कामाला लागल्या आहेत.
पोलीस आणि बॉम्ब शोधक पथक तात्काळ घटनास्थळी दाखल झाले आणि भागात तपासणी केली.मात्र कोणतीही संशयास्पद वस्तू आढळून आली नाही.दरम्यान याआधीही अशा अफवा पसरवण्याच्या घटना समोर आल्या आहेत.कुणीतरी खोडसाळपणा केल्याचा संशय असून फोन करणाऱ्या व्यक्तीचा शोध घेण्यात येत आहे.
