नगर परिषद निवडणुकांसाठी प्रशासन सज्ज; तीन परिषदांमध्ये ६८ जागांसाठी ९२ हजार ८६४ मतदार..

​गडचिरोली :-जिल्ह्यातील गडचिरोली,देसाईगंज आणि आरमोरी या तीन  नगर परिषद अंतर्गत एकूण ६८ सदस्य जागांसाठी  निवडणूक होणार असून यात जिल्ह्याभरातून एकूण ९२ हजार ८६४ मतदार आपला मतदानाचा हक्क बजावणार आहेत,यासाठी या नगरपरिषद क्षेत्रात १०५ मतदान केंद्रे सज्ज करण्यात आली असून निवडणुकीसाठी प्रशासकीय तयारी पूर्ण झाली असल्याची माहिती जिल्हाधिकारी अविश्यांत पंडा यांनी दिली आहे.

• नगर परिषद निहाय तपशील👇

​गडचिरोली नगर परिषद येथे सर्वाधिक ४३ हजार ५१३ मतदार असून,त्यांच्यासाठी ४६ मतदान केंद्रे निश्चित करण्यात आली आहेत.या नगर परिषदेत एकूण २७ सदस्यांची निवड होणार आहे.

​देसाईगंज नगर परिषदेत एकूण २६ हजार ३५२ मतदार असून ३२ मतदान केंद्रांवर मतदानाची प्रक्रिया पार पडेल.या ठिकाणी एकूण २१ सदस्यांची निवड केली जाईल.

​आरमोरी नगर परिषदेमध्ये २२ हजार ९९९ मतदार आहेत,जे २७ मतदान केंद्रांवर मतदान करतील. आरमोरीसाठी एकूण २० सदस्य संख्या निश्चित करण्यात आली आहे.

• आरक्षण आणि महिला प्रतिनिधीत्व👇

​या निवडणुकीत महिला प्रतिनिधीत्वावर विशेष भर देण्यात आला आहे.तिन्ही नगर परिषदांमध्ये निवडून द्यावयाच्या एकूण ६८ सदस्यांपैकी तब्बल ३५ जागा महिलांसाठी राखीव ठेवण्यात आल्या आहेत.

​प्रवर्गनिहाय राखीव जागांची माहिती: एकूण ६८ जागांपैकी ३१ जागा सर्वसाधारण,१८ जागा नामाप्र (नामांकित मागास प्रवर्ग)साठी,११ जागा अनुसूचित जाती आणि ८ जागा अनुसूचित जमातीसाठी राखीव आहेत.

​महिला आरक्षणाचा तपशील: गडचिरोली नगर परिषदेतील २७ पैकी १४ जागा,देसाईगंज नगर परिषदेतील २१ पैकी ११ जागा आणि आरमोरी नगर परिषदेतील २० पैकी १० जागा स्त्रियांसाठी राखीव आहेत.यामध्ये विविध प्रवर्गातील स्त्रियांना संधी मिळाली आहे.गडचिरोलीत सर्वसाधारण गटातील ६ जागा,देसाईगंजमध्ये सर्वसाधारण गटातील ६ जागा आणि आरमोरीमध्ये सर्वसाधारण गटातील ३ जागा स्त्रियांसाठी राखीव आहेत.