दारू शौकिनाने दारू पिण्यासाठी चक्क घरातील ताट व भांडे ठेवले गहाण….

गोंदिया :-दारू पिण्यासाठी कधी कोण,काय करणार याचा नेम नाही.एकदा दारूचे व्यसन जडले की,सहसा सुटण्याचे नावच घेत नाही.खिशात पैसा असला की, ‘येरे ढवळ्या अन् पेरे पवळ्या’ अशी अनेकांची गत झाली आहे.दारुसाठी जुगाळ करून बरोबर आपली तहान भागवतांना अनेकजण दिसून येतात.अशातच दारुसाठी पैसे तसेच जुगाळ जमले नाही; तर अट्टल तळीराम घरातील साहित्य विकून शौक पूर्ण करीत असतात. असाच प्रकार गोंदिया जिल्ह्याच्या गोरेगाव तालुक्यातील तिल्ली मोहगाव येथे उघडकीस आला आहे.एका दारू शौकिनाने दारू पिण्यासाठी चक्क नवऱ्याने घरातील ताट व भांडे गहाण ठेवले,तर ते भांडे परत आणण्यासाठी गेलेल्या त्याच्या पत्नीला महिलेने मारहाण केली.गोरेगाव तालुक्याच्या तिल्ली मोहगाव येथे बुधवारी  सकाळी १०:३० वाजेच्या सुमारास ही घटना घडली.

सिंधू टेंभुर्णीकर यांना घरी स्टीलची बकेट,ग्लास व ताट दिसून आले नाही.यावर त्यांनी पती जयकुमार याला फोन करून सामानासंदर्भात विचारणा केली. जयकुमार याने ते भांडे मीना संतोष कोचे वय ५२ वर्षे हिला दिल्याचे सांगितले.त्यानुसार,सिंधू टेंभुर्णीकर भांडे परत आणण्यासाठी मीना कोचे हिच्या घरी गेली व आपले भांडे आणत असता तुझ्या नवऱ्याला दारू पिण्यास मी बोलवतो का? असे म्हणत मीनाने तिला शिवीगाळ करीत मारहाण केली.या घटनेसंदर्भात गोरेगाव पोलिसांनी मीना कोचे विरुद्ध भारतीय न्याय संहिता कलम ३३२ (सी),२९६,११५ (२),३५१ (२) अन्वये गुन्हा दाखल केला आहे.पुढील तपास पोलिस नायक लांजेवार करीत आहेत.