कर्तव्यावर असतांना हृदयविकाराचा झटका; पोलीस हवालदाराचा मृत्यू..

गडचिरोली :-कर्तव्य बजावत असतांना एका ४९ वर्षीय पोलीस हवालदाराचा हृदयविकाराच्या झटक्याने मृत्यू झाल्याची घटना आज,शुक्रवार २८ फेब्रुवारी रोजी घडली.कोरची तालुक्यातील गॅरापत्ती पोलिस मदत केंद्रात कार्यरत हवालदार संतोष मंथनवार वय ४९ वर्षे,रा.आलापल्ली,ता.अहेरी, जि.गडचिरोली असे मृत्यू झालेल्या पोलीस हवालदाराचे नाव आहे.

माहितीनुसार,संतोष मंथनवार हे कोरची तालुक्याच्या गॅरापत्ती पोलिस मदत केंद्रात कर्तव्य बजावत असतांना आज शुक्रवारी सकाळच्या सुमारास त्यांना अस्वस्थ वाटू लागले व तितक्यातच हृदयविकाराचा झटका आल्याने सहकाऱ्यांनी क्षणाचाही विलंब न लावता सर्वप्रथम गॅरापत्तीच्या प्राथमिक आरोग्य केंद्रात दाखल केले.प्रकृती गंभीर होत चालल्याने परत धानोराच्या ग्रामीण रुग्णालयात हलविण्यात आले.धानोराच्या ग्रामीण रुग्णालयात प्रथमोपचार करण्यात आले व नंतर जिल्हा सामान्य रुग्णालय गडचिरोली येथे हलविण्यात आले.जिल्हा रुग्णालयात दाखल केल्यानंतर तपासणी अंती तेथील डॉक्टरांनी संतोष मंथनवार यांना मृत घोषित केले.अवघ्या ४९ व्या वर्षी हृदयविकाराच्या झटक्याने मृत्यू झाल्याने मंथनवार कुटुंबियांवर मोठा आघात झाला आहे.