एमडी ड्रग्सची तस्करी; आरोपीकडून साडेसात किलो ड्रग्स जप्त.

नागपूर :-नागपूरच्या अंमली पदार्थ विरोधी पथकाने आज,रविवार ३१ मे रोजी मोठी कारवाई करत एका तरुणास अटक करून त्याच्याकडून तब्बल ७ किलो ५०० ग्रॅम एमडी(मोफेड्रोन)ड्रग्स जप्त केला आहे.मजहर अली अकबर अली शेख वय ३२ वर्षे,रा.टेकानाका,नवी वस्ती,पाचपावली,नागपूर असे अटक करण्यात आलेल्या तरुणाचे नाव असून तो म्हाडा कॉलनी परिसरातील एसडीपीएलच्या निवासी संकुलात किरायाने राहतो.

नागपूरच्या जरीपटका पोलिसांच्या गुन्हे शाखेच्या पथकाला परिसरात मोठ्या प्रमाणात एमडीची तस्करी होत असल्याची गोपनीय माहिती मिळाली होती. त्यावरून वरिष्ठ पोलिस निरीक्षक अनिल ताकसांडे यांच्या मार्गदर्शनाखाली सहाय्यक पोलिस निरीक्षक आशिष मोरखडे यांच्या पथकाने मजहरवर पाळत ठेवली होती. दरम्यान,आज रविवारच्या सकाळी त्याच्या खोलीची झडती घेण्यात आली.त्यावेळी पोलिसांना ७ किलो ५०० ग्रॅम एमडी साठा आढळून आला.जप्त करण्यात आलेल्या एमडीची बाजारातील किंमत कोट्यवधी रुपयांच्या घरात आहे.चौकशीदरम्यान आरोपी मजहरने पोलिसांना धक्कादायक माहिती दिली.त्याने दिल्लीतून विविध ठिकाणी जाऊन ही एमडी नागपूरसह राज्यात पाठविण्यासाठी आणल्याची माहिती आहे.त्यासाठी त्याला परराज्यातील महिलेने सहकार्य केल्याची माहिती आहे.त्यामुळे या प्रकरणामागे राज्याबाहेरील तस्करांचे मोठे जाळे कार्यरत असल्याचा संशय बळावला आहे. एवढा मोठा ड्रग्सचा साठा उघडकीस आल्याने तरुणांना नशेच्या खाईत ढकलण्याचे काम तस्करांनी सुरू केल्याचे दिसून येत आहे.