उद्रेक न्युज वृत्त
गडचिरोली :- लोकशाहीच्या सर्वात मोठ्या उत्सवात गडचिरोली-चिमुर लोकसभा मतदार संघात उद्या दिनांक- १९ एप्रिल रोजी मतदान होत आहे.या मतदान प्रक्रियेत सर्व मतदारांनी उत्स्फुर्तपणे सहभाग नोंदवावा आणि भारतीय संविधानाने दिलेला मतदानाचा अधिकार कर्तव्य म्हणून बजावा; असे आवाहन जिल्हाधिकारी संजय दैने यांनी केले आहे.
सार्वत्रिक निवडणुका-२०२४ च्या पहिल्या टप्प्यात गडचिरोली-चिमुर लोकसभा मतदार संघात मतदान होत असून जिल्हा प्रशासन निवडणूक घेण्यासाठी सज्ज झाले आहे.मतदानापासून कोणीही वंचित राहू नये,म्हणून मतदानाच्या दिवशी सुट्टी जाहीर करण्यात आली आहे.मतदारांनी कोणत्याही दबावाला बळी न पडता निर्भिडपणे मतदान करावे.
मतदानाची वेळ
आरमोरी,गडचिरोली,अहेरी व आमगाव या विधानसभा मतदारसंघात मतदानाची वेळ ही सकाळी ७ ते दुपारी ३ पर्यंत आणि ब्रम्हपुरी व चिमुर या विधानसभा मतदार संघात मतदानाची वेळ सकाळी ७ ते सायंकाळी ६ वाजेपर्यंत आहे.
उन्हापासून बचावासाठी सकाळच्या सत्रातच मतदान करावे
उन्हापासून बचावासाठी मतदान केंद्रावर सुविधा उपलब्ध असली तरी नागरिकांनी आरोग्याची काळजी घेत सकाळच्या सत्रातच मतदान करावे,असा संदेश जिल्हाधिकारी दैने यांनी दिला आहे.
