आता रेती तस्करांची खैर नाही..! अवैध उत्खनन,वापर व वाहतूक प्रकरणी रेती तस्करांवर होणार फौजदारी कारवाई.. – शासन परिपत्रक जारी..

उद्रेक न्युज वृत्त :-पूर्वी अवैध रेती उत्खनन व वाहतूक प्रकरणी महसुलचे उपविभागीय कार्यालय व तहसील कार्यालयाकडून शास्तीची कारवाई म्हणून केवळ रक्कम भरून दंड वसूल केले जायचे आणि अवैध रेती वाहतुकीची साधने सोडून दिली जात होती.त्यामुळे बऱ्याच कालावधीपासून राज्यात मोठ्या प्रमाणात रेती व इतर गौण खनिजांचे अनधिकृत उत्खनन,वापर,वाहतुक व तस्करीचे वारंवार प्रकार घडत असल्याचे शासनाच्या निदर्शनास आले.अश्या प्रकारांमुळे शासनाच्या महसुलाची तसेच पर्यावरणाची हानी मोठ्या प्रमाणात होत आहे.वाळू(रेती) व इतर गौण खनिजाचे अनधिकृत उत्खनन,वापर व वाहतूक तसेच तस्करी यामुळे गुन्हेगारी कारवाया वाढत आहेत.यामुळे वाळू व इतर गौण खनिजांचे नियमन करणाऱ्या शासकीय अधिकारी, कर्मचारी यांच्या जिवितास धोका निर्माण होऊन  सार्वजनिक सुव्यवस्थेत देखील बाधा येत आहे.वाळू व इतर गौण खनिजांचे अनधिकृत उत्खनन,वापर व वाहतूक रोखण्यासाठी अशा व्यक्तींवर जबर कारवाई करणे आवश्यक असल्याने,अशा व्यक्तींविरोधात विविध कायदे,अधिनियम,नियम याअन्वये फौजदारी कारवाई करण्याकरीता शासनाने मोठे पाऊल उचलत आता अवैध उत्खनन,वापर व वाहतूक प्रकरणी रेती तस्करांवर विविध कलमान्वये फौजदारी कारवाई करण्यात येणार आहे. याबाबत नुकतेच आठ दिवसांपूर्वी महाराष्ट्र शासन महसूल व वन विभागाच्या वतीने शासन परिपत्रक जारी करण्यात आले आहे.