कोंढाळा जिल्हा परिषद शाळेने ‘मुख्यमंत्री माझी शाळा,सुंदर शाळा’ अभियाना अंतर्गत पटकावला तालुकास्तरीय प्रथम क्रमांक… -शिक्षकदिनी प्रशस्तीपत्र,सन्मान चिन्ह व रोख बक्षिसाचे वितरण…

गडचिरोली :-महाराष्ट्र शासनाने सुरू केलेल्या भारतरत्न डॉ.बाबासाहेब आंबेडकर आदर्श शाळा योजने अंतर्गत ‘मुख्यमंत्री माझी शाळा,सुंदर शाळा’ या अनोख्या स्पर्धात्मक अभियानाचा मागील शैक्षणिक वर्ष २०२३-२४ चा पहिला टप्पा गेल्या वर्षीच पार पडला. त्यानुसार शिक्षक दिनाचे औचित्य साधून काल,गुरुवार दिनांक-५ सप्टेंबरला स्पर्धात्मक अभियानात उत्कृष्ट कार्य करणाऱ्या जिल्ह्यातील शाळांना गडचिरोलीच्या जिल्हा नियोजन भवनात  बक्षीस वितरणाचा कार्यक्रम पार पाडण्यात आला.यामध्ये देसाईगंज तालुक्याच्या यशवंत ग्रामपंचायतीच्या कोंढाळा जिल्हा परिषद उच्च प्राथमिक शाळेने ‘मुख्यमंत्री माझी शाळा,सुंदर शाळा’ अभियाना अंतर्गत तालुक्यातून प्रथम क्रमांक पटकावला असून उपस्थित मान्यवरांच्या हस्ते प्रशस्तीपत्र,सन्मान चिन्ह व रोख बक्षिसाचे वितरण करण्यात आले.

माझी शाळा,सुंदर शाळेच्या पहिल्या टप्प्यात गडचिरोली जिल्ह्यातील जिल्हा परिषदेच्या अनेक शाळांनी सहभाग नोंदवून घेतला होता.या स्पर्धेच्या माध्यमातून विद्यार्थी व शिक्षकांमध्ये नवचैतन्य निर्माण होत असून सकारात्मक बदल होत असल्याचे आढळून येत आहे.’मुख्यमंत्री माझी शाळा,सुंदर शाळा’ उपक्रम राबविण्यामागे शासनाचे अनेक उद्देश आहेत. शैक्षणिक गुणवत्ता विकसित करण्याबरोबरच आरोग्य, स्वच्छता,पर्यावरण,क्रीडा,आदी घटकांबाबत जागृती करणे.विद्यार्थ्यांच्या व्यक्तिमत्व विकासास चालना देणे, शासनाच्या ध्येयधोरणाशी सुसंगत अशा शालेय प्रशासनाच्या बळकटीकरणास चालना देणे हा मुख्य उद्देश आहे.

कोंढाळा येथील जिल्हा परिषद उच्च प्राथमिक शाळेत दरवर्षी विविध उपक्रम राबविण्यात येतात.शाळेत इयत्ता पहिली ते सातवी पर्यंत शाळा भरते; जवळपास ३५० विद्यार्थी शालेय शिक्षण घेत आहेत.शाळेवर शाळा व्यवस्थापन समितीच्या माध्यमातून देखरेख तथा नियंत्रण ठेवल्या जाते.सुसज्ज अश्या इमारती, खुले पटांगण,ई-लर्निंगची सोय,इयत्ता पहिली ते सातवी पर्यंत सेमी इंग्रजी,दरवर्षी समर कॅम्पचे आयोजन, इंग्रजी वाचन लेखन,प्रश्नमंजुषा,मुल्यवर्धक परिपाठ, स्टुडंट्स मनी बँक,बालवाचनालय,जन्म तारीख व दाखल खारीज रजिस्टर नंबर पाठांतर,कलारंजन, वुक्षारोपण,सहल,शाळा स्तरीय क्रीडा संमेलने, डॉ.बाबा साहेब आंबेडकर सप्ताह,महात्मा गांधी सप्ताह,मेरी मिट्टी मेरा देश अंतर्गत विविध उपक्रम शाळेतर्फे राबविण्यात येतात.नुकतेच मागील वर्षात शाळेला ‘पी एम श्री’ योजनेअंतर्गत पुरस्कार प्रदान करण्यात आले होते.या संपूर्ण उपक्रमांची दखल घेत कोंढाळा जिल्हा परिषद शाळेला ‘मुख्यमंत्री माझी शाळा,सुंदर शाळा’ अभियाना अंतर्गत तालुकास्तरीय प्रथम पुरस्काराने गौरविण्यात आले आहे.