गडचिरोली जिल्हा शल्य चिकित्सकपदी डॉ.माधुरी किलनाके यांची नियुक्ती… – चार दिवसांतच डॉ.अनिल रुडे यांची बदली..

यापूर्वीचे जिल्हा शल्यचिकित्सक डॉ.प्रमोद खंडाते हे नियत वयोमानानुसार १२ ऑगस्ट रोजी निवृत्त झाले. तत्पूर्वी त्यांनी महाराष्ट्र प्रशासकीय न्यायाधिकरणाकडे मुदतवाढीसाठी दाद मागितली होती.परंतु २९ जुलैला त्यांनी आपला अर्ज मागे घेतल्याने १२ ऑगस्टला त्यांचा कालावधी संपला.त्यानंतर १३ ऑगस्टला नागपूरच्या आरोग्य उपसंचालक डॉ.कांचन वानेरे यांनी डॉ.खंडाते यांना सेवामुक्त करण्याचे आदेश देऊन रुग्णालयीन प्रशिक्षण केंद्रातील वैद्यकीय अधिकारीडॉ.अनिल रुडे यांच्याकडे जिल्हा शल्यचिकित्सकपदाचा कार्यभार तात्पुरत्या स्वरुपात सोपविला होता.आदेश धडकताच डॉ.रुडे फार वेळ न दवडता पदभार स्वीकारला.मात्र,डॉ.अनिल रुडे हे यापूर्वी पूर्णवेळ जिल्हा शल्यचिकित्सक असताना त्यांनी केलेल्या गैरव्यवहाराबाबत तक्रारी होत्या. त्याअनुषंगाने त्यांची विभागीय चौकशी प्रलंबित आहे. शिवाय विरोधी पक्षनेते विजय वडेट्टीवार यांनीही रुडे यांच्या कार्यकाळात झालेल्या गैरव्यवहाराची चौकशी करण्याची मागणी केली होती.असे असताना आरोग्य उपसंचालकांनी डॉ.रुडे यांच्याकडेच पुन्हा जिल्हा शल्यचिकित्सकपदाचा कार्यभार सोपविल्याने सर्व स्तरातून टीकेची झोड उठविण्यात आली.माध्यमांनीही हा विषय लावून धरला होता.अखेर सार्वजनिक आरोग्य विभागाचे अवर सचिव व्ही.पी.गायकवाड यांनी जिल्हा सामान्य रुग्णालयातील वैद्यकीय अधिकारी (शस्त्रक्रिया) डॉ.माधुरी किलनाके यांच्या नियुक्तीचे आदेश आज जारी केले.त्यानंतर आरोग्य उपसंचालक डॉ.कांचन वानेरे यांनी यासंदर्भात पत्र दिले आहे.