उद्रेक न्युज वृत्त
गडचिरोली :-जिल्ह्यात आज,१९ जुलैला हवामान खात्याने २४ तासाकरीता पर्जन्यमानाचा रेड अलर्ट दिलेला असून काही ठिकाणी ‘फ्लॅश फ्लड रिस्क’ चे संकेत दिलेले आहेत.सध्या स्थितीत सगळीकडेच मुसळधार पावसाचा जोर कायम आहे.त्यामुळे नद्यांच्या पाणलोट क्षेत्रात झालेल्या अतिवृष्टीमुळे स्थानिक नद्या व नाले तसेच वैनगंगा,प्राणहिता,वर्धा, गोदावरी व इंद्रावती या मुख्य नद्यांची पाणी पातळी वाढण्याची शक्यता आहे.नदी काठावरील गावातील नागरीकांनी उचित सतर्कता बाळगावी; असे आवाहन स्थानिक प्रशासनाकडून केले जात आहे.
पर्जन्यमान नोंदीनुसार जिल्ह्यात एकूण सरासरी ५२.० मि.मी.पाऊस पडलेला असून तहसीलच्या ४० पैकी १३ मंडळामध्ये अतिवृष्टीची नोंद करण्यात आली आहे.जिल्ह्याच्या सिरोंचा तालुक्यातील सिरोंचा मंडळमध्ये सर्वाधिक २७०.८ मि.मी.पावसाची नोंद करण्यात आली आहे.
पुरामुळे बंद असलेले मार्ग👇
१.आलापल्ली-भामरागड राष्ट्रीय महामार्ग (कडकेली नाला)
२. एटापल्ली-गट्टा अलगंडी रस्ता (बांडीया नदी)
३. चौखेवाडा-एटापल्ली-आलापल्ली राज्यमार्ग (एटापल्ली जवळ स्थानिक नाला)
पुलावरून पाणी वाहत असतांना पादचारी,वाहनधारक व इतर नागरिकांनी पुलावरून आवागमन करू नये; असे आवाहन जिल्हा प्रशासनाद्वारे करण्यात आले आहे.
