उद्रेक न्युज वृत्त
गडचिरोली :-जिल्ह्यातील दुर्गम,ग्रामीण भागात धावणाऱ्या भंगार एसट्या नेहमीच चर्चेचा विषय ठरत आहेत.कधी धावत्या बसचा पत्राच उडतो तर कधी रस्त्यातच बस बंद पडते तर कधी बेरिंग पट्टाच तुटतो तर कधी खळखळ आवाज करून जणूकाही गाणी लागली की काय? अशी अनेक प्रकरणे गडचिरोली जिल्ह्यातील बसेसच्या बाबतीत उघडकीस येऊ लागले आहेत.धावत्या बसचा पत्रा उडाल्याचा प्रकार मागे उघड झाला होता.अशातच आता धावणाऱ्या बसमधून पाऊस पाणी सीटवर गळू लागल्याने बसमध्ये ‘टिप टिप बरसा पाणी’ असे होऊन प्रवाशी चक्क छत्री घेऊन प्रवास करतांना दिनांक- ८ जुलै रोजी सायंकाळी ५ वाजता पोटेगाव मार्गावर सदर प्रकार घडल्याचे उघडकीस आले आहे.पावसाला सुरुवात झाल्याने बसमधील छतगळती सुरू झाली.यामुळे प्रवाशांना सीटवर बसण्यासाठी कोरडी जागा शिल्लक नव्हती.केवळ प्रवाशांनाच नव्हे तर वाहकालासुद्धा या समस्येचा सामना करावा लागला आहे.गडचिरोली आगारातील एमएच ०६ एस ८८६४ क्रमांकाची बस सायंकाळी गडचिरोली येथून सुटली.ही बस पोटेगावमार्गे घोट येथे निवासी असते.या बसमध्ये ८० टक्के महिला होत्या.ही बस पूर्णतः जीर्ण असल्याने बसच्या छतातून पाणी गळत होते.सदर व्हिडीओ याच बसमध्ये प्रवास करणाऱ्या एका प्रवाशांनी स्वतः व्हायरल केला आहे.घोट ते गडचिरोली दरम्यान धावणाऱ्या बसमध्ये पावसाचे पाणी सीटवर पडत आहे.बसमध्ये पाणी टपातून गळत असताना अनेक प्रवासी पावसाच्या बचावाकरीता उभे आहेत.यातील काहींनी चक्क छत्र्या उघडल्या आहेत.यामध्ये महिला,पुरूषांसह शालेय विद्यार्थ्यांचा समावेश आहे.प्रवाशांच्या सोयीसुविधेसाठी एसटी महामंडळ प्रशासन विविध योजनांचा जागर करीत असले तरी प्रत्यक्ष रस्त्यावर धावणाऱ्या एसटीच्या देखभाल दुरुस्तीकडे दुर्लक्ष केल्या जात असल्याचे दिसून येत आहे.एकीकडे शहरात वातानुकूलित बसमध्ये अनेकांचा प्रवास होत असतांना अतिदुर्गम भागातील नागरिकांच्या माथी भंगार बसेस दुमटल्या जात असल्याचा आरोप प्रवाशांमधून होत आहे.आधीच नादुरुस्त बसमुळे प्रवाशी वैतागले असताना पावसाचे पाणी चक्क बसमध्ये टपकत असल्याने एसटी महामंडळ प्रशासनाप्रती नागरिकांमध्ये संताप व्यक्त केला जात आहे.
