उद्रेक न्युज वृत्त
गोंदिया :- प्रवासी भरून अर्जुनी मोरगावातून भंडाराकडे निघालेली एसटी बस रस्त्यात अडवून बसमध्ये चढून दोन मद्यधुंद व्यक्तींनी धिंगाणा घालून एसटीच्या मालमत्तेचे नुकसान केले.ही घटना अर्जुनी मोरगाव तालुक्यातील बोंडगावदेवी येथे गुरुवारी दुपारी ३.२० वाजताच्या सुमारास घडली.
भंडारा आगाराची एमएच-४०/एआय ५३६१ क्रमांकाची एसटी बस प्रवासी भरून गुरुवारी अर्जुनी मोरगाव येथून भंडाराकडे जाण्यास निघाली होती. दरम्यान बोंडगावदेवी येथील रस्त्यावर मद्यधुंद अवस्थेत असलेल्या जयप्रकाश पंढरी बारसागडे वय ३२ वर्षे आणि गजानन मणिराम बारसागडे वय ३४ वर्षे दोन्ही रा.बोंडगावदेवी यांनी रस्त्याच्या मधोमध उभे राहून बस अडविली.बसचालकाने बस थांबविल्यानंतर ते दोघेही बसमध्ये चढले.त्यानंतर त्यांनी बसच्या बेलची दोरी तोडून वाहक तेजस्व लेखीराम वंजारी वय ४३,रा.वरठी,जि.मोहाडी यांना आम्हाला बस चेक करायची आहे; असे म्हणत वाहकाला शिवीगाळ केली.वाहकाचे कॉलर पकडल्याने शर्टचे बटन तुटले.शासकीय कामात अडथळा निर्माण केल्याच्या कारणावरून वाहकाच्या तक्रारीनुसार अर्जुनी मोरगाव पोलिसांनी दोन्ही दारुड्यांविरोधात गुन्हा नोंदविला असून तपास महिला पोलिस उपनिरीक्षक अश्विनी कदम करीत आहे.
