उद्रेक न्युज वृत्त
भामरागड(गडचिरोली) :- एटापल्ली तालुक्यातील नक्षलप्रभावित व अतिदुर्गम कसनसूर भागात रस्ता बांधणीच्या कामासाठी वनक्षेत्रातून बेसुमार मुरुम उपसा करण्यात आला.याकडे सोयीस्कररीत्या दुर्लक्ष केल्याचा ठपका ठेवून चार वनकर्मचाऱ्यांना १० मे रोजी निलंबित करण्यात आले आहे.या कारवाईने भामरागड वनविभागात एकच खळबळ उडाली आहे. कसनसूर वनपरिक्षेत्रातील झुरी नियतक्षेत्रात कार्यरत असलेले वनरक्षक एम.ए.निलेकार,नियतक्षेत्रातील वनरक्षक सोहगाव बी.डी.उसेंडी,वागेझरीचे क्षेत्र सहायक ए.आर.कुमरे व भापडाचे क्षेत्र सहायक डी.के.वासेकर यांचा निलंबित कर्मचाऱ्यांत समावेश आहे.
कसनसूर परिसरात सध्या नव्या रस्त्यांची कामे मोठ्या प्रमाणात सुरू आहेत.याकरिता वनपरिक्षेत्रातून बेसुमार मुरुम उपसा करण्यात आला.याकडे वनरक्षक व क्षेत्र सहायकांनी दुर्लक्ष केल्याची माहिती वरिष्ठांना मिळाली.त्यावरून भामरागडच्या सहायक वनसंरक्षकांनी चौकशी करून अहवाल भामरागडचे उपवनसंरक्षक शैलेश मीना यांना सादर केला.मीना यांनी चारही कर्मचाऱ्यांना प्राथमिक चौकशी अहवालाआधारे १० मेरोजी निलंबित केले आहे.
या सर्वांना निलंबन काळात मुख्यालयात हजेरी लावणे बंधनकारक आहे.या कारवाईने बेशिस्त कर्मचाऱ्यांमध्ये खळबळ उडाली आहे.वनक्षेत्रातील मुरुमाचे नियमबाह्य उत्खनन केल्याप्रकरणी चार वनकर्मचाऱ्यांचे निलंबन करण्यात आले; पण कंत्राटदारावरील कारवाईबाबत कुठलीही पावले उचललेली दिसत नाहीत.त्यामुळे कंत्राटदाराला या प्रकरणातून सोयीस्कररीत्या ‘साईड कॉर्नर करण्याचा प्रयत्न होत असल्याची चर्चा आहे.
