उद्रेक न्युज वृत्त
मुख्य संपादक/सत्यवान रामटेके
गडचिरोली :- मागील गेली दोन वर्षांपासून सातत्याने वनपाल ते वनक्षेत्रपाल पदाची विभागीय पदोन्नती समिती रखडली आहे.त्यामुळे मागासवर्गीय वनपाल यांचेवर अन्याय होत आहे.विभागीय पदोन्नती समिती रखडलेली असल्याने अनेकांना वनपाल पदावरच सेवानिवृत्त व्हावे लागत आहे.वनपाल पद हे पदोत्रतीचे पद आहे.सदर पदावरील सर्व वनपाल हे वयस्क व सेवानिवृत्तीच्या किंवा जवळपासच्या वयोगटातील कार्यरत असून वनपाल ते वनक्षेत्रपाल पदावर पदोन्नती प्रक्रिया राबविणे आवश्यक आहे.मात्र तसे होत नसल्याने मागासवर्गीय कर्मचारी यांचेवर एकप्रकारे अन्याय केला जातो आहे.त्यासाठी वनपाल ते वनक्षेत्रपाल पदाची रखडलेली नागरी सेवा मंडळाची बैठक तात्काळ घेऊन,लवकरात लवकर पदोन्नती देऊन,मागासवर्गीय कर्मचारी यांचेवरील अन्याय दूर करावा; यासाठी आज दिनांक-६ नोव्हेंबर २०२३ रोजी गडचिरोली कास्ट्राईब वनविभाग कर्मचारी संघटनेच्या वतीने गडचिरोलीचे वनसंरक्षक रमेश कुमार यांच्या मार्फत प्रधान मुख्य वनसंरक्षक (वनबल प्रमुख) महाराष्ट्र राज्य नागपूर,यांना निवेदन सादर करण्यात आले आहे.
गडचिरोली कास्ट्राईब वनविभाग कर्मचारी संघटनेच्या वतीने दिलेल्या निवेदनात म्हटले आहे की,मागील दोन वर्षाचा विचार करता सन २०२१ मध्ये ४९ तसेच सन २०२२ मध्ये ४१ वनपाल हे वनपाल याच पदावर सेवानिवृत्त झाले आहेत.सन २०२३ या वर्षात ३०, व पुढील वर्षाच्या २०२४ मध्ये १६ आणि २०२५ मध्ये १० वनपाल सेवानिवृत्त होणार आहेत.त्यामुळे वनपाल पदावरुन वनक्षेत्रपाल पदावर पदोन्नतीची प्रक्रिया पार न पडल्यास मागासवर्गीय कर्मचा-यांना पदोन्नती पासून वंचीत रहावे लागणार आहे.तसेच दिनांक – १३.१०.२०२३ चे अनुषंगाने वनक्षेत्रपाल गट (ब) संवर्गातून सहाय्यक वनसंरक्षक संवर्गात पदोन्नती व रिक्त होणा-या वनक्षेत्रपाल पदाचे अनुषंगाने वनपाल ते वनक्षेत्रपाल पदाची रखडलेली नागरी सेवा मंडळाची बैठक तात्काळ घेऊन लवकरात लवकर पदोन्नती देऊन मागासवर्गीय कर्मचारी यांचेवरील अन्याय दूर करण्यात यावा; अशी मागणी गडचिरोली कास्ट्राईब वनविभाग कर्मचारी संघटनेच्या वतीने निवेदनाद्वारे करण्यात आले आहे.
निवेदन सादर करतेवेळी संघटनेचे जिल्हाध्यक्ष,नामदेव बन्सोड,महासचिव सिध्दार्थ गोवर्धन,उपाध्यक्ष विजय कंकलवार, सहसचिव नितेश सोमलकर,अमित दंडेवार,प्रकाशभाऊ नैताम आदी सदस्य उपस्थित होते.
