भंगार खरेदी-विक्रीचा व्यवसाय चालू ठेवण्यासाठी लाचेची मागणी.. -३० हजार घेतांना पोलीस हवालदारास रंगेहाथ पकडले..

मुंबई :-भंगार खरेदी-विक्रीचा व्यवसाय करणाऱ्या एका ३३ वर्षीय इसमास पोलीस हवालदाराने दम देत परिसरात भंगार खरेदी-विक्रीचा व्यवसाय चालू ठेवायचा असेल तर ३५ हजार रुपये द्यावे लागतील,असे म्हणत तडजोडी अंती ३० हजारावर डन करताच मुंबई लाच लुचपत प्रतिबंधक विभागाच्या(एसीबी)पथकाने पोलीस हवालदारास रंगेहाथ पकडले.राजेंद्र कृष्णा पवार वय ४६ वर्षे,पो.ह.क्र.३५६२ भोईवाडा पोलीस ठाणे,ठाणे शहर असे लाचखोर पोलीस हवालदाराचे नाव आहे.

एसीबीने दिलेल्या माहितीनुसार,प्रकरणातील ३३ वर्षीय पुरुष तक्रारदार यांचा भंगार खरेदी-विक्रीचा व्यवसाय असून ठाणे शहरातील भोईवाडा पोलीस ठाण्यात कार्यरत असणारे पोलीस हवालदार राजेंद्र पवार यांनी तक्रारदार यांना भंगार खरेदी-विक्रीचा व्यवसाय चालू ठेवायचा असल्यास तसेच त्यांच्या व्यवसायास कोणताही त्रास होणार नाही,याकरीता ३५ हजार रुपये लाचेची मागणी केली.तक्रारदार यांना लाच देण्याची इच्छा नसल्याने त्यांनी लाच लुचपत प्रतिबंधक विभाग मुंबई येथे १९ ऑगस्ट २०२६ रोजी तक्रार केली.प्राप्त तक्रारीच्या अनुषंगाने काल,गुरुवार २० ऑगस्ट रोजी एसीबीच्या पथकाने पडताळणी केली असता,राजेंद्र पवार यांनी तक्रारदार यांच्याकडे तडजोडीअंती ३० हजार रुपये लाचेची मागणी करून लाच स्विकारण्याचे मान्य केल्याचे निष्पन्न झाले. त्यानुसार,काल गुरुवारी तात्काळ करण्यात आलेल्या सापळा कारवाई दरम्यान राजेंद्र पवार यांना तक्रारादार यांच्याकडून ३० हजार रुपये लाच स्विकारतांना रंगेहाथ पकडण्यात आले.त्यानुसार,आज शुक्रवार २१ ऑगस्ट रोजी ठाणे शहराच्या भोईवाडा पोलीस ठाण्यात राजेंद्र पवार यांच्या विरोधात गुन्हा रजिस्टर नं.३४५/२०२६,भ्रष्टाचार प्रतिबंध अधिनियम १९८८ कलम ७ नुसार गुन्हा दाखल करून अटक करण्यात आली.सदची कारवाई-सापळा अधिकारी मनोज गोडसे,पोलीस निरीक्षक,मो.नं.९८२१७३७३७९