फिर्यादी मुलगाच निघाला मुख्य आरोपी; गुरवळा नदी परिसरातील जंगलात आढळला होता मृतदेह..

दोन दिवसांपूर्वी मृतक बादल कोसनकर याने आरोपीच्या बहिणीबद्दल अपशब्द वापरले होते.यावरुन दोघांमध्ये भांडण झाले होते.याचाच राग मनात धरून आरोपीने बादलचा काटा काढण्याचा कट रचला.त्यासाठी त्याने काल,बुधवार २७ मेच्या दुपारी बादलला गांजा ओढण्यास बोलावून गुरवळा परिसरातील जंगलात नेले.काही वेळाने दोघेही घरी जाण्यास निघाले.मात्र,बादल पुढे जात असतांना आरोपीने मागून त्याच्यावर कुऱ्हाडीने जोरदार प्रहार केला.डोक्यावर वार केल्याने बादलचा घटनास्थळीच मृत्यू झाला.सुरुवातीला आरोपीने गुन्हा छपविण्यासाठी पोलीस ठाण्यात जाऊन खोटी माहिती दिली आणि अनोळखी तरुणांचा सहभाग असल्याचे सांगितले.परंतु,पोलिसांनी मोबाईल चॅटिंग,तांत्रिक तपास व अन्य बाबींच्या आधारावर अवघ्या काही तासांतच हत्या प्रकरणाचा उलगडा केला.या प्रकरणी गडचिरोली पोलीस ठाण्यात भारतीय न्याय संहिता कलम १०३(१) आणि ३(५)अन्वये गुन्हा दाखल करण्यात आला असून सदरची तपास कारवाई गडचिरोली पोलीस ठाण्याचे पीएसआय पूजा नैताम, पीएसआय प्रवीण बुंदे यांचेसह पथकाने केली.