बांधकाम कामगार मंडळात कार्यरत डेटा एन्ट्री ऑपरेटरने कामगारांचे पैसे हडपले… – लाभार्थ्यांचे बँक खाते बदलून ५ लाख ६१ हजार रुपये टाकले आपल्याच खात्यावर…

गोंदिया :-बांधकाम कामगार मंडळातर्फे नोंदणीकृत लाभार्थ्यांना विविध कल्याणकारी योजनांचा लाभ दिला जातो.काहींना पेटी तर काहींना ५ हजाराचे लाभ देण्यात येते.अशातच कामगारांना मिळणारी रक्कम एका कंत्राटी कर्मचाऱ्याने स्वतःच्या खात्यावर वळती केल्याचे प्रकरण उघडकीस आल्याने एकच खळबळ उडाली.इमारत व इतर बांधकाम कामगारांना कल्याणकारी मंडळातर्फे देण्यात येणाऱ्या लाभाच्या योजनांचे पैसे कॉम्प्युटर ऑपरेटरने आपल्या खात्यात वळती केल्याप्रकरणी त्याच्यावर फसवणुकीचा गुन्हा दाखल करण्यात आला आहे.आरोपी उमेश रोशनलाल बिसेन रा.सावरी हा इमारत व इतर बांधकाम कामगार कल्याण मंडळ येथे कंत्राटी डेटा एन्ट्री ऑपरेटर पदावर कार्यरत होता.त्याने १५ फेब्रुवारी ते १२ जून २०२४ या काळात बांधकाम मंडळातील लाभार्थ्यांचे बँक खाते बदलून लाभार्थ्यांचे ५ लाख ६१ हजार रुपये आपल्या खात्यावर वळती करून शासनाची फसवणूक केली. अविनाश लक्ष्मण ढोके वय ५३ वर्षे,रा. प्रतापनगर, नागपूर यांच्या तक्रारीवरून २२ नोव्हेंबर रोजी शहर पोलिसांनी आरोपी उमेश बिसेनविरुद्ध भारतीय न्याय संहिता कलम ४२०,४१७,४२० अन्वये गुन्हा दाखल केला आहे.अधिक तपास सहाय्यक फौजदार धीरज राजूरकर करीत आहेत.