स्वच्छतेबाबत प्राप्त तक्रारींची दखल घेत आयुक्तांनी तब्बल ३९ कर्मचारी केले निलंबित..

नागपूर :-स्वच्छता कार्यात हयगय करणाऱ्या कारवाईसाठी कामचुकारांवर नागपूर महानगरपालिकेने कठोर पवित्रा घेतला आहे.काल, मंगळवारी घनकचरा व्यवस्थापन विभागाद्वारे करण्यात आलेल्या आकस्मिक पाहणीत विनापरवानगी गैरहजर आढळलेल्या ३९ सफाई कर्मचाऱ्यांना निलंबित करण्यात आले आहे. महापालिका आयुक्त डॉ.अभिजित चौधरी यांच्या निर्देशानुसार ही कारवाई करण्यात आली.

शहरातील विविध भागांत स्वच्छतेबाबत प्राप्त तक्रारींची दखल घेत आयुक्तांनी सोमवारी लक्ष्मीनगर आणि धरमपेठ झोनमध्ये भेट देऊन पाहणी केली होती.यावेळी त्यांनी कामात हलगर्जी करणाऱ्या कामचुकार कर्मचाऱ्यांवर कारवाईबाबत विभागाला निर्देश दिले होते.मंगळवारी घनकचरा व्यवस्थापन विभागाद्वारे पुन्हा आकस्मिक पाहणी करण्यात आली. यात एका वरिष्ठ स्वास्थ्य निरीक्षकासह तीन मलवाहक जमादार,एक प्रभारी जमादार व ३४ सफाई कामगार विनापरवानगी गैरहजर असल्याचे आढळून आले.सर्व कर्मचाऱ्यांना निलंबित करून त्यांच्याविरुद्ध विभागीय चौकशीचे आदेश देण्यात आले आहेत.आयुक्तांच्या निर्देशानुसार अतिरिक्त आयुक्त आंचल गोयल, घनकचरा व्यवस्थापन विभागाचे संचालक डॉ.गजेंद्र महल्ले यांच्यासह दहाही झोनच्या सहायक आयुक्तांद्वारे आकस्मिक पाहणी करण्यात आली.