शिवसेनेचे गडचिरोली जिल्हाप्रमुख सुरेंद्रसिंह चंदेल यांच्यावर गुन्हा दाखल…

गडचिरोली :-बनावट पुरावे देऊन जात प्रमाणपत्र मिळविल्या प्रकरणी ठाकरे सेनेचे गडचिरोली जिल्हाप्रमुख सुरेंद्रसिंह चंदेल यांच्यावर कुरखेडा ठाण्यात २८ ऑगस्टला फसवणुकीचा गुन्हा नोंद झाला.चंदेल यांनी महाविकास आघाडीच्या जागावाटपाच्या निर्णयाआधीच आरमोरी विधानसभा मतदारसंघातून प्रचाराचा नारळ फोडला होता.कुरखेडाचे प्रभारी उपविभागीय अधिकारी विवेक साळुंके यांनी खंडपीठाच्या आदेशाचा संदर्भ देत नायब तहसीलदार रेखा बोके यांना प्राधिकृत म्हणून नेमले,त्यानंतर रेखा बोके यांनी कुरखेडा ठाण्यात फिर्याद दिली.

त्यानुसार,सुरेंद्रसिंह चंदेल यांनी जात प्रमाणपत्रासाठी दिलेल्या पुराव्याआधारे १ ऑक्टोबर २०१९ रोजी छत्री या अनुसूचित जमातीचे प्रमाणपत्र कुरखेडाच्या तत्कालीन उपविभागीय अधिकाऱ्यांनी निर्गमित केले होते.या प्रमाणपत्राआधारे चंदेल यांनी आरमोरी विधानसभा निवडणूक लढवली होती.यास नीताराम कुमरे रा.चिखली ता.कुरखेडा यांनी आव्हान दिले होते.

त्यानंतर जात प्रमाणपत्र पडताळणी समितीने २८ नोव्हेंबर २०२२ रोजी हे प्रमाणपत्र रद्द केले.यास चंदेल यांनी न्यायालयात आव्हान दिले.मात्र,न्यायालयातही त्यांचा निभाव लागला नाही.अखेर त्यांच्याविरुद्ध भारतीय दंड संहिता कलम ४२०,४६५,४६६,४६८, ४७१ नुसार गुन्हा नोंद झाला.त्यानुसार पोलीस उपनिरीक्षक वर्षा बोरसे पुढील तपास करीत आहेत.