वळण मार्गावर स्कॉर्पिओ वाहन आणि ट्रॅव्हल्सची धडक; ५ जणांचा मृत्यू तर ११ जण गंभीर जखमी.. – आज सायंकाळच्या घटनेने हळहळ..

गडचिरोली :-जिल्ह्यात आज,रविवार २९ मार्च रोजी भीषण अपघाताची घटना घडून अपघातात तब्बल ५ जणांचा मृत्यू झाला,तर ११ जण गंभीर जखमी झाले. सदरची घटना आज सायंकाळी पावणे सात वाजेच्या सुमारास गडचिरोली-चामोर्शी मार्गावर घडली.

याबाबत अधिक माहिती अशी की,एमएच ४६ पी ५३९२ क्रमांकाचे स्कॉर्पिओ वाहन रामपूर येथील विवाह सोहळा आटोपून भाडभीडी मोकासा येथे परतत होते.स्कॉर्पिओ वाहनात तब्बल १६ जण प्रवास करत होते.दरम्यान, एमएच १५ सीके ५००५ क्रमांकाची ट्रॅव्हल्स गडचिरोली वरून कोणसरी येथील कर्मचारी वर्गाला घेऊन निघालेली असतांनाच कुरुड-कढोली गावादरम्यान नाल्याजवळील वळण मार्गावर दोन्ही वाहने एकमेकांना धडकली.धडक इतकी भीषण होती की स्कॉर्पिओ वाहनाचा समोरील भाग चक्काचूर होऊन वाहनात अनेकजण अडकून पडले होते.घटना घडताच मार्गावरून जाणाऱ्या नागरिकांनी घटनास्थळी धाव घेत मदतकार्य सुरू केले.काही जणांचा घटनास्थळीच मृत्यू झाला,तर गंभीर जखमींना तातडीने गडचिरोली येथील जिल्हा सामान्य रुग्णालयात हलविण्यात आले.अश्यातच दोघांचा वाटेतच मृत्यू झाला. जखमींवर उपचार सुरू असून काहींची प्रकृती चिंताजनक आहे.घटनेने परिसरात हळहळ व्यक्त केली जात आहे.