वर्ल्ड चॅम्पियन बुद्धिबळपटू दिव्या देशमुखला मिळाले तीन कोटी रुपये.. – देशाचे सरन्यायाधीश भूषण गवई यांनी घरी जाऊन दिल्या शुभेच्छा..

नागपूर :-नागपूरची १९ वर्षीय कन्या दिव्या देशमुख हिने बुद्धिबळ स्पर्धेत देशाचे नाव जगभरात उंचावले आहे.अश्यातच आज,शनिवार २ ऑगस्ट रोजी ग्रॅन्डमास्टर दिव्या देशमुख यांचा भव्य ‘नागरी सन्मान सोहळा’ नागपूर येथे संपन्न झाला.नागपूरमधील या सोहळ्याला मुख्यमंत्र्यांसह क्रीडामंत्री ॲड. माणिकराव कोकाटे,राज्यमंत्री ॲड.आशिष जयस्वाल, आमदार कृष्णा खोपडे,आमदार डॉ.परिणय फुके व इतर मान्यवर उपस्थित होते.राज्य सरकारच्यावतीने नागपूरकन्या आणि महाराष्ट्रकन्या म्हणून दिव्याचा सत्कार करत तिला तीन कोटी रुपयांचे पारितोषिकही देण्यात आले.यावेळी,दिव्यामुळे महाराष्ट्राची,देशाची मान जगभरात उंचावल्याची भावना मुख्यमंत्र्यांनी व्यक्त केली.दिव्याच्या विजयाने मला तिहेरी अभिमान आहे,असे म्हणत मुख्यमंत्री देवेंद्र फडणवीस यांनी दिव्या देशमुखच्या बुद्धीबळातील सुवर्ण विजयाचे कौतुक केले.पुढे बोलतांना मुख्यमंत्री म्हणाले की,दिव्याकडून सर्वांना प्रेरणा मिळाली,यासाठी तिचा नागरी सत्कार करण्याचे आयोजन केले.

देशाचे सरन्यायाधीश भूषण गवई यांनी बुद्धीबळ विश्व विजेती दिव्या देशमुख हिच्या नागपूरमधील शंकरनगर येथील घरी जाऊन तिला शुभेच्छा देत शाबासकी दिली.आमचे तीन पिढ्यापासूनचे कौटुंबिक नाते आहे,दिव्याचा विजय हा कौटुंबिक आनंदाचा क्षण आहे,अशी भावना सरन्यायाधीश भूषण गवई यांनी यावेळी व्यक्त केली.दिव्याने यंदाच्या वर्ल्ड चेस चॅम्पियन स्पर्धेत अजिंक्यपद पटकावत जगभरात तिरंगा फडकवला.