वडसा-कुरखेडा-कोरची राज्य महामार्गासाठी ९४.९१ कोटी निधी मंजूर.. – आमदार रामदास मसरामांच्या पाठपुराव्याला यश..

गडचिरोली :-आरमोरी विधानसभा क्षेत्राचे आमदार रामदास मसराम यांनी नुकतीच महाराष्ट्र राज्याचे सार्वजनिक बांधकाम मंत्री छत्रपती शिवेंद्रसिंहराजे भोसले यांची भेट घेत वडसा-कुरखेडा-कोरची ते राज्य

महामार्ग रस्त्याची दुरावस्था झाल्याने यासाठी महामार्गाच्या निधीच्या प्रस्तावास लवकर मंजुरी द्यावी व सदर महामार्गाचे काम तात्काळ सुरू करावे; अशी मागणी केली होती.त्यानुसार सार्वजनिक बांधकाम मंत्री भोसले यांनी तात्काळ मागणी पूर्ण करत या महामार्गासाठी ९४ कोटी ९१ लाख रुपयांच्या निधीला मंजुरी दिली असल्याने आमदार रामदास मसरामांच्या पाठपुराव्याला यश आले आहे.

आमदार मसराम यांनी सर्वप्रथम त्या-त्या तालुक्यात दौरे करून जनतेशी थेट संपर्क साधून समस्या जाणून घेतल्या होत्या.महामार्गावरील रस्त्यांची बऱ्याच कालावधीपासून दुरावस्था झालेली होती.अशातच वडसा-कुरखेडा-कोरची ते राज्य सीमा-राज्यमार्ग ३१४ हा महामार्ग अत्यंत महत्त्वाचा आहे.सद्या स्थितीत अर्थसंकल्पीय अधिवेशन सुरू असतांनाच मसराम यांनी राज्याचे सार्वजनिक बांधकाम मंत्री छत्रपती शिवेंद्रसिंहराजे भोसले यांच्या कार्यालयात जाऊन महामार्गाची व्यथा मांडली होती.त्यानुसार भोसले यांनी राज्यमार्ग ३१४ महामार्गावरील रस्त्याचे मजबुतीकरण कि.मी.१३२/२०० ते १४४/४०० (ता.कोरची) या करीता ९४ कोटी ९१ लाख रुपयांच्या निधीला मंजुरी दिली आहे.रस्ता चौपदरीकरणामुळे रस्त्यावरील वाहनांची गर्दी कमी होण्यास नक्कीच मदत होणार आहे.तसेच महामार्गावरून कृषी माल व व्यावसायिक माल वाहतूक करणे सोपे होणार आहे.महामार्गाचे काम लवकरच सुरू होणार असल्याचे आमदार मसराम यांनी स्पष्ट केले असल्याने परिसरातील नागरिकांकडून समाधान व्यक्त होत आहे.