येत्या बुधवारी गडचिरोली येथे मोफत वैद्यकीय व दंत तपासणी शिबीर..

गडचिरोली :-जिल्हा सामान्य रुग्णालय गडचिरोली येथे येत्या,बुधवार १ ऑक्टोंबर २०२५ रोजी “स्वस्थ नारी, सशक्त परिवार” अभियान अंतर्गत मोफत वैद्यकीय व दंत शिबीराचे आयोजन करण्यात आले आहे.या शिबिराचे आयोजन जिल्हा सामान्य रुग्णालय गडचिरोली,आरोग्य विभाग,जिल्हा परिषद गडचिरोली तसेच शासकीय वैद्यकीय महाविद्यालय व रुग्णालय गडचिरोली यांच्या संयुक्त विद्यमाने करण्यात आले आहे.सदरचे शिबिर जिल्हा सामान्य रुग्णालय  गडचिरोली येथील बाह्यरुग्ण विभागात सकाळी ९ ते दुपारी ४ वाजेपर्यंत पार पडणार आहे.

शिबिरामध्ये खालील महत्त्वाच्या आजारांबाबत तपासण्या,निदान व उपचार उपलब्ध करून देण्यात येणार आहेत.

• पौष्टिक आहार व पोषण जागृती
• सिकलसेल,थैलेसेमिया,ॲनिमिया व हिमोफिलिया तपासणी.
• मुख,स्तन व गर्भाशय मुख कर्करोग तपासणी
• तंबाखू व तंबाखूजन्य पदार्थांचे दुष्परिणाम
• दंत तपासणी व नेत्ररोग तपासणी
• मानसिक आरोग्य तपासणी
• मधुमेह व उच्च रक्तदाब तपासणी
• क्षयरोग तपासणी

या शिबिरात नेत्ररोग अधिकारी,दंतचिकित्सक, शल्यचिकित्सक,अस्थिरोग तज्ञ,भिषक,आयुष वैद्यकीय अधिकारी(आयुर्वेद व होमिओपॅथी)तसेच तज्ञ अधिकारी व कर्मचारी उपस्थित राहणार आहेत.

शिबिरादरम्यान महिलांचे आरोग्य,कुटुंब नियोजन,मातृ व बाल आरोग्य तसेच पोषण या विषयांवर विशेष भर देण्यात येईल.सर्व तपासण्या व उपचार,सेवा पूर्णपणे विनामूल्य दिल्या जातील.

जिल्हा शल्य चिकित्सक डॉ.माधुरी किलनाके यांनी जिल्ह्यातील महिला,किशोरवयीन मुली तसेच सर्व नागरिकांना या शिबिराचा लाभ घेण्याचे आवाहन केले आहे. “स्वस्थ नारी,सशक्त परिवार-निरोगी समाज” हा संदेश आपण घराघरात पोहोचवू या,असेही त्यांनी नमूद केले.

शिबिरात सहभागी होणाऱ्या नागरिकांनी विशेषतः महिलांनी आधार कार्ड,राशन कार्ड,आभा कार्ड व आयुष्यमान कार्ड सोबत आणावेत,असे कळविण्यात आले आहे.