यंदा राख्यांच्या दरात १० टक्क्यांची वाढ..!

उद्रेक न्युज वृत्त :-रक्षाबंधन म्हणजे बहीण भावाच्या प्रेमळ नात्याचा ऋणानुबंध जपणारा सण.मात्र,यंदा भावा-बहिणीच्या प्रेमाचे प्रतीक असणाऱ्या राख्यांच्या किंमतीत वाढ झाली आहे.तरीही रक्षाबंधननिमित्त बाजारपेठा गर्दीने फुलल्या असून भावाला आवडेल अशी राखी घेण्यासाठी बहिणींची बाजारात लगबग सुरू आहे.दुसरीकडे युवावर्ग आपल्या बहिणीसाठी भेटवस्तू खरेदी करतांना दिसत आहेत.रक्षाबंधनाचा सण आज,शनिवार ९ ऑगस्ट रोजी असून गावगाड्यात तसेच बाजारपेठेत आकर्षक राख्यांची भर दिसून येत आहे. काही बहिणींनी भावांना राख्या पोस्टाने पाठवल्या आहेत.पूर्वी पाच रुपये डझनप्रमाणे मिळणाऱ्या देवराख्या आता सात ते आठ रुपयांना मिळत आहेत.बाजारात ५ रुपयांपासून ते ३०० रुपयांपर्यंतच्या राख्या असून ५० ते १०० रुपयांच्या राख्यांची जास्त विक्री होत आहे. बाजारात लहान राख्यांना ग्राहकांची विशेष पसंती मिळत आहे. राखीसाठी लागणारे रेशीम,कुंदन व मजुरीत वाढ झाल्याने यंदा राख्यांच्या दरात आणखी १० टक्क्यांची वाढ झाल्याचे सांगितले जात आहे.चिमुकल्यांसाठी लायटिंग राख्या,छोटा भीम,डोरेमॉन,मोटू पतलू, श्रीगणेशा,श्रीकृष्ण अशा राख्यांची विक्री सुरू आहे. कुंदन वर्क असलेल्या साध्या राख्यांना अधिक मागणी असून लायटिंग,लाकडी,पपेट,कडा राखीसह पारंपरिक देव राख्याही बाजारात उपलब्ध आहेत.