कुरखेड्यात नवीन बस डेपो उभारणीसह विविध मुद्द्यांवर आमदार मसरामांची बैठक संपन्न..

गडचिरोली :-जिल्ह्याच्या कुरखेडा तालुक्यात स्वतंत्र बस डेपो उभारण्यात यावा,तसेच कुरखेडा-नागपूर आणि कोरची-नागपूर बससेवा तातडीने सुरू करण्यात यावी, अशी मागणी आमदार रामदास मसराम यांनी केली. यासंदर्भात आज,बुधवार २५ फेब्रुवारीला झूम मीटिंगद्वारे संबंधित विभागाच्या अधिकाऱ्यांसोबत व जिल्हाधिकारीयांच्या अधक्षतेखाली बैठक घेऊन विविध मुद्द्यांवर सविस्तर चर्चा करण्यात आली.

सदर बैठकीत महाराष्ट्र राज्य मार्ग परिवहन महामंडळ (MSRTC)अंतर्गत कुरखेडा येथे बस डेपोची आवश्यकता अधोरेखित करण्यात आली.तालुक्यातून मोठ्या प्रमाणावर नागरिकांना नागपूर येथे शिक्षण, आरोग्य व शासकीय कामांसाठी जावे लागते.मात्र,थेट बससेवेअभावी प्रवाशांना अडचणींचा सामना करावा लागत असल्याचे आमदार मसराम यांनी निदर्शनास आणून दिले.

कुरखेडा-नागपूर तसेच कोरची-नागपूर या थेट बसफेऱ्या सुरू झाल्यास विद्यार्थ्यांना,रुग्णांना व सर्वसामान्य नागरिकांना मोठा दिलासा मिळेल,असेही त्यांनी सांगितले.याशिवाय मानव विकास अंतर्गत सुरू असलेल्या बससेवा नियमित व सुरळीत ठेवण्याबाबतही स्पष्ट सूचना देण्यात आल्या.बैठकीत संबंधित अधिकाऱ्यांनी मागण्यांबाबत सकारात्मक भूमिका दर्शवून प्रस्ताव पुढील कार्यवाहीसाठी सादर करण्याचे आश्वासन दिले.लवकरच या मागण्यांवर ठोस निर्णय होईल,अशी अपेक्षा व्यक्त करण्यात येत आहे.