अवैध रेतीची वाहतूक करताय; जरा सांभाळून.. आता वाहनाचा परवाना होणार रद्द; शासन परिपत्रक जारी..

राज्यात मोठ्या प्रमाणात वाळू व इतर गौण खनिजांचे अनधिकृत उत्खनन,वापर,वाहतुक व तस्करीसाठी ड्रील मशीन,जेसीबी व पोकलैंड,ट्रॅक्टर,ट्रॅक्टर ट्रॉली, हाफ बॉडी ट्रक,फुल बॉडी ट्रक,डंपर,ट्रॉलर,कॉम्प्रेसर,ट्रॉलर,बार्ज, मोटोराईज्ड बोट,एक्सकॅवेटर,मॅकेनाईज्ड लोडर यासारख्या वाहनांचा वापर करण्यात येत असल्याचे वारंवार प्रकार घडत असल्याचे शासनाच्या निदर्शनास आले आहे.त्यामुळे महसुलाची तसेच पर्यावरणाची हानी मोठ्या प्रमाणात होत आहे.

वाळू व इतर गौण खनिजांचे अनधिकृत उत्खनन,वापर व वाहतूक रोखण्यासाठी अशा व्यक्तींवर जबर कारवाई करणे आवश्यक असल्याने,अशा व्यक्तींविरोधात परिवहन विभागाचे विविध कायदे/अधिनियम/नियम याअन्वये कारवाई करण्यात आल्यास वाळू व इतर गौण खनिजांचे अनधिकृत उत्खनन,वापर,वाहतुक व तस्करीचे वारंवार होणारे प्रकार नियंत्रणात आणणे शक्य होण्यासाठी तसेच महसुलाची तसेच पर्यावरणाची हानी टाळण्यासाठी तसेच अनधिकृतपणे होणाऱ्या या व्यवहारात सामिल वाहनधारकांना जरब बसण्यासाठी आणि निर्णय घेण्यासाठी राज्य परिवहन प्राधिकरणास निर्देश देण्याबाबत विभागाने विनंती केली होती. त्यानुषंगाने राज्य परिवहन प्राधिकरणाने राज्यातील सर्व प्रादेशिक परिवहन प्राधिकणांनी निर्णय घेण्याकरिता दिलेल्या निर्देशाची योग्य अंमलबजावणी होण्यासाठी सदर निर्देश क्षेत्रीय यंत्रणेच्या निदर्शनास आणण्याची बाब शासनाच्या विचाराधीन होती.त्यानुषंगाने खालील प्रमाणे सूचना/निर्देश देण्यात येत आहेत.

राज्य परिवहन प्राधिकरणाने वाळू व इतर गौण खनिजांचे अनधिकृत उत्खनन,वापर व अवैध वाहतूक करणाऱ्या वाहनांवर आळा घालण्यासाठी व राज्यातील सर्व प्रादेशिक परिवहन प्राधिकरणाच्या कामकाजात समानता राहण्याच्या दृष्टीने तसेच राज्यातील सर्व प्रादेशिक परिवहन प्राधिकरणांच्या धोरणामध्ये एकसूत्रता आणण्यासाठी राज्यात वाळू व इतर गौण खनिजांचे अनधिकृत उत्खनन,वापर व अवैध वाहतूक करणाऱ्या वाहनांच्या परवान्यावर मोटार वाहन अधिनियम,१९८८ च्या कलम ८६ मधील तरतुदीनुसार विभागीय कारवाई करण्यासाठी राज्यातील सर्व प्रादेशिक परिवहन प्राधिकरणांनी खालीलप्रमाणे निर्णय घेण्याचे निर्देश दिलेले आहेत:-

गुन्ह्याचे स्वरूप-राज्यात वाळू व इतर गौण खनिजांचे अनधिकृत उत्खनन करून अवैधपणे वाहतूक करणारी वाहने

पहिला गुन्हा-३० दिवस परवाना निलंबित व वाहन अटकावून ठेवणे

दुसरा गुन्हा-६० दिवस परवाना निलंबित व वाहन अटकावून ठेवणे

तिसरा गुन्हा-वाहन अटकाव करून परवाना रद्द करण्यासाठी संबंधित प्रादेशिक परिवहन प्राधिकरणामार्फत कार्यवाही करणे.

यामुळे अवैध गौण खनिज वाहतूकीवर आळा घातला जाईल व वारंवार होणारी तस्करी रोखण्यासाठी मोठे पाऊल उचलण्यात आल्याचे दिसून येते.त्याचबरोबर

वाळू व इतर गौण खनिजांचे अवैध/अनधिकृत,उत्खनन, वापर,वाहतूक व तस्करी रोखण्याच्या अनुषंगाने संबंधित वाहनांची माहिती क्षेत्रीय यंत्रणेने संबंधित परिवहन यंत्रणेस कळविण्याची कार्यवाही करावी जेणे करून संबंधित वाहनांवर कारवाई करणे शक्य होईल,असेही परिपत्रकात नमूद आहे.