अतिरिक्त शुल्क घेणारा स्टॅम्प विक्रेता एसीबीच्या जाळ्यात..

उद्रेक न्युज वृत्त :-शेतीच्या कामासाठी स्टॅम्प पेपरची खरेदी करणाऱ्या एका शेतकऱ्यास शासकीय स्टॅम्प विक्रेत्याने ६०० रुपये अतिरिक्त शुल्काची मागणी करून ५०० रुपयांवर तडजोड केली.प्रकरणी एसीबीच्या पथकाने सापळा रचून ५०० रुपयांसाठी एका शासकीय स्टॅम्प विक्रेत्यास पंचासमक्ष रंगेहाथ अटक केली आहे. सदरची कारवाई ही अकोला जिल्ह्याच्या बाळापुर तहसिल कार्यालय परिसरात काल शुक्रवारी दुपारच्या सुमारास करण्यात आली. श्याम वंसत देशपांडे वय ५५ वर्षे,व्यवसाय-शासकीय स्टॅम्प विक्रेता तहसिल कार्यालय बाळापुर,रा.गणेश मंदीरजवळ,जुने शहर किल्ला विभाग, ता.बाळापुर,जि.अकोला असे अटक करण्यात आलेल्या स्टॅम्प विक्रेत्याचे नाव आहे.विशेष म्हणजे,स्टॅम्प विक्रेत्यांना शासकीय दरानुसारच स्टॅम्पची विक्री करणे अनिवार्य असतांनाही काहीजण जास्तीचे पैसे घेतांना दिसून येतात.यासाठी एखादा दणका मिळणे आवश्यक असल्याचे नागरिकांचे म्हणणे आहे.

एसीबीने दिलेल्या माहितीनुसार,तक्रारदार यांना शेतीच्या कामाकरीता ५०० चे ४ स्टॅम्प व १०० चे १० स्टॅम्प पेपरची आवश्यकता होती.त्यामुळे,१५ ते २० दिवसांपूर्वी तक्रारदार हे स्टॅम्प विक्रेता श्याम देशपांडे यांना भेटले.त्यानुसार,देशपांडे यांनी ५०० चे ४ स्टॅम्प २ हजार रुपयांचे होत असतांना २ हजार ४०० रुपयांची मागणी केली.तर १०० चे १० स्टॅम्प पेपर १ हजार रुपयांत होत असतांना २०० रुपये अतिरिक्त म्हणजेच १ हजार २०० रुपयांची मागणी केली.संपूर्ण स्टॅम्प पेपर ३ हजार रुपयांचे होत असतांना ६०० रुपये अतिरिक्त शुल्काची मागणी केल्याने तक्रारदार यांनी गुरुवार २६ फेब्रुवारीला अकोला येथील लाच लुचपत प्रतिबंधक विभागाकडे तक्रार नोंदवली.सदर तक्रारीवरुन शुक्रवार,२७ फेब्रुवारी रोजी बाळापुर तहसिल कार्यालयात लाच मागणी पडताळणी करण्यात आली.सदर लाच मागणी पडताळणी कार्यवाही दरम्यान स्टॅम्प विक्रेत्याने ३ हजार ५०० रुपये स्विकारून त्यामध्ये स्वतःच्या आर्थिक फायद्याकरिता ५०० रुपये लाच रक्कम स्विकारल्याने स्टॅम्प विक्रेता श्याम देशपांडे याचेविरूध्द बाळापुर पोलीस ठाण्यात गुन्हा दाखल करण्यात आला आहे.