सुरक्षा दलास मोठे यश; १ कोटी रुपयांचे बक्षीस असलेल्या नक्षलवाद्यासह १० नक्षली ठार.. – दुसऱ्या घटनेतील आयईडी स्फोटात दोन जवान गंभीर जखमी..

उद्रेक न्युज वृत्त :-सुरक्षा दल आणि नक्षलवाद्यांमध्ये उडालेल्या चकमकीत सुरक्षा दलास मोठे यश मिळाले असून आज,गुरुवार ११ सप्टेंबरला छत्तीसगडच्या गरियाबंद जिल्ह्यातील मैनपूरमधील भालाडिगी माटलच्या घनदाट जंगलात १ कोटी रुपयांचे बक्षीस असलेल्या नक्षलवाद्यासह १० नक्षलवाद्यांचा खात्मा करण्यात आला आहे.याशिवाय,छत्तीसगडच्या दंतेवाडा जिल्ह्यातील मालेवाही पोलिस स्टेशन हद्दीत आज,गुरुवारी नक्षलवाद्यांनी पेरलेल्या प्रेशर आयईडी स्फोटात केंद्रीय राखीव दलाच्या १९५ बटालियनचे दोन जवान जखमी झाल्याची घटना इंद्रावती नदीवरील सतधार पुलाजवळ सकाळी साडे दहा वाजेच्या सुमारास घडली.यात इन्स्पेक्टर दिवाण सिंग गुर्जर आणि कॉन्स्टेबल आलम मुनेश गंभीर जखमी झाले आहेत. त्यांना एअरलिफ्ट करून रायपूरला हलविण्यात आले.

छत्तीसगडच्या गरियाबंद जिल्ह्यातील मैनपूरमधील भालाडिगी माटलच्या घनदाट जंगलात सुरक्षा दलांकडून नक्षलवाद्यांविरोधात काल बुधवार पासूनच संयुक्त मोहीम सुरू आहे.गुप्त माहितीच्या आधारे एसटीएफ,कोब्रा (केंद्रीय राखीव दलाची कमांडो बटालियन फॉर रिझोल्यूट ॲक्शन)आणि राज्य पोलिस कर्मचारी यांनी काल बुधवारी या परिसरात नक्षलविरोधी मोहीम सुरू केली होती.अश्यातच आज गुरुवारी सुरक्षा दल आणि नक्षलवाद्यांमध्ये चकमक झाली.या चकमकीत सुरक्षा दलाने दहा नक्षलवाद्यांचा खात्मा केला आहे.चकमकीत नक्षलवादी कमांडर मनोज उर्फ मोडेम बालकृष्ण उर्फ भास्कर ठार झाला आहे.मोडेमचा खात्मा हे सुरक्षा दलांचे मोठे यश मानले जाते.तो ओडिसा राज्य समितीचा प्रमुख होता.मोडेमवर १ कोटी रुपयांचे बक्षीस घोषित करण्यात आले होते.मोडेमवर हत्या,लूट आणि पोलिसांवरील हल्ले यासारखे अनेक गंभीर गुन्हे दाखल होते.तसेच अनेक नक्षली मोहिमांचा मोडेम मास्टरमाईंड होता.अजूनही अधूनमधून गोळीबार सुरू असल्याचे रायपूर रेंजचे आयजी अमरेश मिश्रा यांनी म्हटले आहे.