सीलिंग फॅनला गळफास घेऊन पोलीस शिपायाची आत्महत्या.. – गडचिरोली जिल्ह्यातील आजची घटना..

गडचिरोली :-जिल्ह्याच्या अहेरी तालुक्यातील

पोलीस उपमुख्यालय प्राणहिता या ठिकाणी पोलीस शिपाई पदावर कार्यरत ३८ वर्षीय पोलिसाने वास्तव्यास असणाऱ्या पोलीस संकुल इमारतीच्या सीलिंग फॅनला गळफास घेऊन आत्महत्या केल्याची घटना आज,रविवारी ८ डिसेंबरला उघडकीस आल्याने जिल्ह्यातील पोलीस विभागात एकच खळबळ उडाली आहे.अविनाश सुंदरराव नाईकवाडे असे गळफास घेतलेल्या पोलीस शिपायाचे नाव आहे.

याबाबत अधिक माहिती अशी की,अहेरीच्या पोलीस उपमुख्यालय प्राणीता या ठिकाणी पोलिसांना राहण्याकरिता पोलीस संकुल इमारत आहे.पोलीस संकुल इमारतीच्या खोली क्रमांक-४ मध्ये २६ वर्षीय पोलीस शिपाई अमीर शेट्टे व अविनाश नाईकवाडे हे दोघेही आज सकाळच्या सुमारास एकाच खोलीमध्ये होते.अमीर शेट्टे हे खोलीतील गॅलरीमध्ये मोबाईलवर चित्रपट बघत होते.अशातच अमीर शेट्टे खोलीच्या आतमधील हॉल मध्ये गेले असता,त्यांना अविनाश नाईकवाडे पोलीस संकुल इमारतीतील सीलिंग फॅनला लटकलेल्या स्थितीत आढळून आले.त्यामुळे शेट्टे यांनी क्षणाचाही विलंब न लावता घटनेबाबत अहेरी पोलीस ठाण्यास कळविले.अहेरी पोलिसांनी घटनास्थळ गाठून पंचनामा केला.मृतदेह उत्तरीय तपासणीसाठी रुग्णालयात दाखल करण्यात आला असून घटनेचा पुढील तपास अहेरी पोलीस प्रशासन करीत आहे.

पोलीस शिपायाने आत्महत्येसारखे टोकाचे पाऊल कां उचलले हे अपद्याही कळू शकले नाही.