वाघाच्या हल्ल्यात महिला गंभीर जखमी..

गोंदिया :-जंगल परिसरात तेंदूपाने संकलन करीत असतांनाच दबा धरून बसलेल्या वाघाने एका महिलेवर हल्ला करून गंभीर जखमी केल्याची घटना काल शनिवारी गोंदिया जिल्ह्याच्या अर्जुनी मोरगाव तालुक्यातील इटियाडोह धरणाच्या लगत असलेल्या गंधारी-जांभळी जंगल परिसरात घडली.सुनीता चंद्रकुमार हटवार वय ४७ वर्षे,रा.बोंडगाव सुरबन,ता.अर्जुनी-मोरगाव,जि.गोंदिया असे वाघाच्या हल्ल्यात गंभीर जखमी झालेल्या महिलेचे नाव आहे.

सध्या विदर्भातील गडचिरोली,चंद्रपूर,नागपूर,गोंदिया, भंडारा व इतर तालुक्यात तेंदूपत्ता तोडण्याचा हंगाम सुरू आहे.त्यामुळे ग्रामीण भागातील अनेक कुटुंब तेंदूपत्ता तोडण्यासाठी जंगलात जातात.विशेष म्हणजे,ग्रामीण भागातील ग्रामस्थांना तब्बल दीड महिने रोजगार मिळतो. अश्याच प्रकारे गोंदिया जिल्ह्याच्या अर्जुनी-मोरगाव तालुक्यातील बोंडगाव सुरबन येथील महिला सुनिता हटवार या काल शनिवारी सकाळच्या सुमारास इटियाडोह धरणाच्या लगत असलेल्या गंधारी-जांभळी जंगल परिसरात तेंदूपाने संकलनासाठी गावातील इतर महिला तथा आपल्या पतीसोबत गेल्या होत्या.दरम्यान, तेंदूपाने संकलन करीत असतांनाच दबा धरून बसलेल्या वाघाने सुनीतावर पाठीमागून हल्ला चढवून गंभीर जखमी केले.यामुळे घाबरलेल्या सुनीताने जोर-जोराने ओरडायला सुरुवात केली व वाघाच्या तावडीतून सुटका करण्याचा प्रयत्न केला.ओरडल्याने वाघाने घटनास्थळावरून पळ काढला.अश्यातच सुनीताचा आवाज ऐकून आजूबाजूला असणारे सर्व तेंदूपाने संकलन करणाऱ्या महिला व मजूर तिच्या दिशेने धावून गेले.यावेळी त्यांना सुनीता जखमी अवस्थेत आढळली. यानंतर लगेच तिला उपचारार्थ गोठणगाव येथील प्राथमिक आरोग्य केंद्रात नेऊन प्राथमिक उपचार करण्यात आले.त्यानंतर पुढील उपचारार्थ नवेगावबांध येथील ग्रामीण रुग्णालय येथे दाखल करण्यात आले.तिथे सुनीतावर उपचार सुरू आहे.